തോൽപ്പെട്ടിയിൽ കിറ്റുകൾ പിടികൂടിയ സംഭവം: തിരുനെല്ലി പൊലീസ് കേസെടുത്തു

തിരുനെല്ലി∙ തെരഞ്ഞെടുപ്പ് കമ്മിഷന്റെ ഫ്ലൈയിങ് സ്ക്വാഡ് നടത്തിയ പരിശോധനയിൽ ഭക്ഷ്യവസ്തുക്കൾ ഉൾപ്പെടെയുള്ള കിറ്റുകൾ പിടികൂടിയ സംഭവത്തിൽ തിരുനെല്ലി പൊലീസ് കേസെടുത്തു. തോൽപ്പെട്ടി വേണാട്ട് വീട്ടിൽ വി.എസ്. ശശികുമാറിനെതിരെയാണ് കേസെടുത്തത്. മാനന്തവാടി ജുഡീഷ്യൽ ഫസ്റ്റ് ക്ലാസ് മജിസ്ട്രേട്ട്–2  കോടതി കേസെടുക്കാനുള്ള അനുമതി നൽകിയതിനെ തുടർന്നാണ് പൊലീസ് നടപടി.

ഏഴാം തീയതി 11.45-ഓടെയാണ് സംഭവം. തോൽപ്പെട്ടിയിൽ വാർഡ് നമ്പർ നാലിലെ അരിമില്ലിനോട് ചേർന്ന കെട്ടിടത്തിൽ നിന്നാണ് 38 കിറ്റുകൾ പിടിച്ചെടുത്തത്. ഫ്ലൈയിങ് സ്ക്വാഡ് ഓഫിസർ കെ.പി. സുനിത്തിന്റെ നേതൃത്വത്തിലാണ് കിറ്റുകൾ പിടിച്ചെടുത്തത്.