ഭയന്നത് യാഥാർഥ്യമായി; ഗാസയിൽ 10 മാസമുള്ള കുഞ്ഞിന് പോളിയോ

ഗാസ ∙ പലസ്തീനിൽ ഇസ്രയേൽ – ഹമാസ് യുദ്ധം തകർത്ത ഗാസയിൽ ഭയന്നതു പോലെ പോളിയോ പടരുന്നു. പ്രധാന ആക്രമണകേന്ദ്രമായ ദെയ്ർ അൽ ബലായിൽ 10 മാസം പ്രായമുള്ള കുഞ്ഞിന് ടൈപ്പ് 2 പോളിയോ വൈറസ് ബാധിച്ച് ഇടതുകാൽ തളർന്നു. 25 വർഷത്തിനു ശേഷമാണ് ഇവിടെ പോളിയോ സ്ഥിരീകരിക്കുന്നത്. യുദ്ധം മൂലം സാനിറ്റേഷൻ സംവിധാനം തകർന്ന ഗാസയിൽ പോളിയോ പടരുമെന്നു മുന്നറിയിപ്പുണ്ടായിരുന്നു. 

രോഗം പടരുന്നതു തടയാൻ കുഞ്ഞുങ്ങൾക്ക് പോളിയോ വാക്സീൻ നൽകുന്നതിന് 7 ദിവസം വെടിനിർത്തലിന് ഹമാസിനോടും ഇസ്രയേലിനോടും ലോകാരോഗ്യ സംഘടന അഭ്യർഥിച്ചെങ്കിലും ഫലമുണ്ടായില്ല. വെടിനിർത്തൽ ഇല്ലാതെ ഈ മാസം അവസാനവും അടുത്ത മാസം ആദ്യവുമായി 7 ദിവസം പോളിയോ വാക്സീൻ നൽകാൻ ലോകാരോഗ്യ സംഘടന ശ്രമിക്കുന്നുണ്ട്. ഗാസയിൽ നൽകുന്നതിനായി 43,000 വയ്ൽ ഡബിൾ ഡോസ് പോളിയോ വാക്സീൻ ശേഖരിച്ചതായി ഇസ്രയേൽ സേനയുടെ സന്നദ്ധപ്രവർത്തന വിഭാഗം അറിയിച്ചു.