ലൈംഗികാതിക്രമം: പുതിയ കേസിൽ കുറ്റം നിഷേധിച്ച് വെയ്ൻസ്റ്റൈൻ

ന്യൂയോർക്ക് ∙ പുതിയ ലൈംഗികാതിക്രമക്കേസിൽ ഹോളിവുഡ് നിർമാതാവ് ഹാർവി വെയ്ൻസ്റ്റൈൻ കുറ്റം നിഷേധിച്ചു. 2006 ൽ മൻഹാറ്റനിലെ ഹോട്ടലിൽ വച്ച് പീഡിപ്പിച്ചുവെന്ന പരാതിയിൽ ന്യൂയോർക്ക് സ്റ്റേറ്റ് കോടതിയിൽ ഹാജരായാണ് കുറ്റം നിഷേധിച്ചത്. ഹൃദയ ശസ്ത്രക്രിയ കഴിഞ്ഞ് വിശ്രമിക്കുന്ന വെയ്ൻസ്റ്റൈൻ (72) ചക്രക്കസേരയിലാണ് കോടതിയിലെത്തിയത്. 

2013 ൽ ലൊസാഞ്ചലസിൽ നടിയെ പീഡിപ്പിച്ച കേസിൽ 16 വർഷത്തെ തടവുശിക്ഷ ലഭിച്ച വെയ്ൻസ്റ്റൈൻ നിലവിൽ ജയിലിലാണ്. ഹോളിവുഡിൽ കോളിളക്കം സൃഷ്ടിച്ച ‘മീ ടൂ’ മുന്നേറ്റത്തിനിടയാക്കിയ മറ്റു ചില ലൈംഗികാതിക്രമക്കേസുകളിൽ വെയ്ൻസ്റ്റൈനെതിരായ ശിക്ഷ 5 മാസം മുൻപ് കോടതി റദ്ദാക്കിയിരുന്നു. ഇനിയും 2 കേസുകൾ കൂടി വിചാരണഘട്ടത്തിലുണ്ട്.