കേരളത്തിലെ കൂട്ടത്തോൽവി; സിപിഐ കണ്ടെത്തി കാരണങ്ങൾ; പ്രധാനം ഭരണവിരുദ്ധ വികാരം

കേരളത്തിലെ എൽഡിഎഫ് കൂട്ടത്തോൽവിയിൽ ഭരണവിരുദ്ധ വികാരം പങ്കുവഹിച്ചതായി സിപിഐ. ഡൽഹിയിൽ നടന്ന പാർട്ടി ദേശീയനിർവാഹക സമിതിയിലാണ് കേരള നേതൃത്വം ഇക്കാര്യം റിപ്പോർട്ട് ചെയ്തത്. തോൽവിയിലേക്കു നയിച്ചത് രണ്ടു പ്രധാന കാരണങ്ങളാണെന്ന് സംസ്ഥാന നേതൃത്വം അഭിപ്രായപ്പെട്ടു. രാജ്യത്ത് ഇന്ത്യാസഖ്യത്തിന് അനുകൂലമായി കണ്ട ‘ട്രെൻഡ്’ കേരളത്തിൽ കോൺഗ്രസ് നേതൃത്വത്തിലുള്ള യുഡിഎഫിന് അനുകൂലമായി. രണ്ടാമത്തേത്, സംസ്ഥാന സർക്കാരിനോടുള്ള മതിപ്പില്ലായ്മ തന്നെ. രാഷ്ട്രീയവും ഭരണപരവുമായ ഈ രണ്ടു സാഹചര്യങ്ങളും ഗൗരവത്തോടെ വിലയിരുത്തി തുടർനടപടികളിലേക്കു കടന്നേ തീരൂ.