10 വർഷത്തെ ഇടവേള; ചോദിക്കാനും പറയാനും പ്രതിപക്ഷം; തുടങ്ങി ലോക്സഭയിൽ സാംപിൾ ‘വെടിക്കെട്ട്’

ലോക്സഭാ സ്പീക്കർ തിരഞ്ഞെടുപ്പിനു കളമൊരുക്കി സ്ഥാനാർഥിയെ ഇറക്കിയ ഇന്ത്യാസഖ്യം വ്യക്തമാക്കുന്ന നയം ഇതാണ് – ബിജെപിയും ഭരണപക്ഷവും തീരുമാനിക്കുന്ന വഴിയേ ഇനി കാര്യങ്ങൾ നടക്കില്ല. പാർലമെന്റിൽ വരാനിരിക്കുന്ന പോരാട്ടങ്ങളുടെ സാംപിളാണ് ഇതെന്നായിരുന്നു കോൺഗ്രസ് നേതാക്കളിലൊരാളുടെ പ്രതികരണം. ഭൂരിപക്ഷമില്ലാത്തതിനാൽ കൊടിക്കുന്നിൽ സുരേഷിനെ വിജയിപ്പിക്കാനാകില്ലെങ്കിലും ബിജെപിക്കെതിരായ നിരന്തര പോരാട്ടത്തിലൂടെ പ്രതിപക്ഷത്തിന്റെ വീര്യമുയർത്തുകയാണ് ഇന്ത്യാസഖ്യത്തിന്റെ ലക്ഷ്യം. കഴിഞ്ഞ 10 വർഷം ഇങ്ങനെയൊരു മത്സരത്തെക്കുറിച്ചു ചിന്തിക്കാൻപോലും പ്രതിപക്ഷത്തിനാകുമായിരുന്നില്ല.