തിരഞ്ഞെടുപ്പ് കഴിഞ്ഞു;നാം എന്തുനേടും? – സക്കറിയ എഴുതുന്നു

ഇന്ത്യയുടെ 18–ാമതു തിരഞ്ഞെടുപ്പ് അവസാനിക്കുകയാണ്. ജൂൺ നാലിനു ഫലം പ്രഖ്യാപിക്കപ്പെടും. ഏതെങ്കിലുമൊരു പാർട്ടി അല്ലെങ്കിൽ മുന്നണി അടുത്ത അഞ്ചു വർഷത്തേക്ക് ഇന്ത്യയുടെയും 142 കോടി ജനങ്ങളുടെയും പരമാധികാരികളായിത്തീരും. ജനങ്ങളായ നമ്മുടെ കാര്യമോ? നാം എന്തു നേടി? നമ്മുടെ ജീവിതങ്ങളെ ഏതു വിധത്തിലുള്ള മാറ്റങ്ങളിലേക്കാണ് ഈ തിരഞ്ഞെടുപ്പു നയിക്കുക? തലമുറകൾ നീണ്ട ദാരിദ്ര്യത്തിൽനിന്നും അധഃസ്ഥിതത്വത്തിൽനിന്നും കോടിക്കണക്കിനു പൗരർക്കു മോചനമുണ്ടാകുമോ? ഉദ്യോഗസ്ഥ ദുഷ്പ്രഭുത്വത്തിൽനിന്നും അഴിമതിയിൽനിന്നും വിടുതലുണ്ടാകുമോ?നമ്മുടെ കുഞ്ഞുങ്ങൾ മതത്തിന്റെയും ജാതിയുടെയും തീവ്രവാദങ്ങളിൽനിന്നു സുരക്ഷിതരായിരിക്കുമോ? അന്ധവിശ്വാസങ്ങളിൽനിന്നും ദുരാചാരങ്ങളിൽനിന്നും നാം മോചിതരാവുമോ?