മുറി അടച്ചിടുന്ന കുട്ടികളോട് വഴക്കു വേണ്ട; നാടു വിടുന്നതും പ്രതിഷേധം; ആ സ്വകാര്യതയ്ക്ക് പരിധി വേണ്ടേ?

തമ്മിൽ പരിചയമില്ലാത്ത രണ്ടു സുഹൃത്തുക്കളുടെ കുടുംബങ്ങളിൽനിന്നാണ് ഈയിടെ റിപ്പോർട്ടു ചെയ്ത രണ്ടു സങ്കടകരമായ വാർത്തകൾ വന്നത്. രണ്ടും പുതിയ തലമുറയിൽപെട്ട കുട്ടികൾ ഉൾപ്പെട്ടവ. തമ്മിൽ ബന്ധമില്ലാത്തവയെങ്കിലും രണ്ടു വാർത്തയിലും എളുപ്പം വായിച്ചെടുക്കാവുന്ന ഒരു പൊതുഘടകമുണ്ട്: തുറക്കാത്ത വാതിൽ. സുഹൃത്തുക്കളുടെ കുടുംബങ്ങളിൽ നടന്നവയായതുകൊണ്ടും ഞങ്ങളുടെ വീട്ടിലും ഒരു ന്യൂജൻ കുട്ടി ഉള്ളതുകൊണ്ടും വരികൾക്കിടയിൽനിന്നു വായിച്ചെടുക്കാതെതന്നെ ഈ പൊതുവില്ലനെ തിരിച്ചറിയാൻപറ്റി എന്നു മാത്രം. കേരളത്തിലെ ഭൂരിപക്ഷം വരുന്ന മിഡിൽ, അപ്പർ മിഡിൽ ക്ലാസുകളിൽപെട്ട കുടുംബങ്ങളിലെ ഒന്നോ രണ്ടോ വരുന്ന കുട്ടികൾക്കു പലർക്കും ഇപ്പോൾ സ്വന്തമായി മുറികളുണ്ട്. കുട്ടികൾ വീട്ടിലുള്ളപ്പോഴെല്ലാം അവ പലപ്പോഴും ഉള്ളിൽനിന്ന് അടഞ്ഞുകിടക്കുന്നു.