ജീവിതത്തിന് ‘ലാസ്റ്റ് സല്യൂട്ട്’ നൽകുന്ന പൊലീസുകാർ കൂടുന്നു; ഈ ദുരന്തത്തിന് ഉത്തരവാദികളാര്?

ജനത്തിനു സംരക്ഷണം നൽകേണ്ട പൊലീസുകാർ, കരുത്തും ആത്മബലവുമുണ്ടെന്നു കരുതി സമൂഹം ആശ്രയിക്കുന്നവർ, ഏതു സാഹചര്യത്തെയും നേരിടാൻ പരിശീലനം നേടിയവർ... പക്ഷേ, സ്വന്തം ജീവനുപോലും സംരക്ഷണം നൽകാൻ കഴിയാതെ, ജീവിതത്തിന് അവസാന സല്യൂട്ട് നൽകി മരണത്തിലേക്കു നടന്നുപോകുന്ന പൊലീസുകാരുടെ എണ്ണം കൂടിക്കൂടി വരുന്നു. ഇന്നലെ മരിച്ചനിലയിൽ കാണപ്പെട്ട, തിരുവനന്തപുരം സിറ്റി ട്രാഫിക് എൻഫോഴ്സ്മെന്റ് യൂണിറ്റിലെ സിവിൽ പൊലീസ് ഓഫിസറുടെ പേരുകൂടി ആ പട്ടികയിൽ ചേർക്കപ്പെട്ടിരിക്കുന്നു. സംസ്ഥാനത്ത് അഞ്ചര വർഷത്തിനുള്ളിൽ 82 പൊലീസ് ഉദ്യോഗസ്ഥർ ആത്മഹത്യ ചെയ്തു. ജോലി സമ്മർദത്താൽ 7 പേരും വിഷാദരോഗത്താൽ 20 പേരും എന്നാണു പഠനം. മറ്റുള്ളവരുടെ ആത്മഹത്യയ്ക്കു കാരണമെന്തെന്നു പോലും കണ്ടെത്താനായിട്ടില്ല.