തീപാറും പന്തുകളുമായി കളം നിറഞ്ഞ ഒലോങ്ക; ജീവൻ ഭയന്ന് രാജ്യം വിട്ടു; ഇന്നെവിടെയാണ് താരം?

ഒരുകാലത്ത് ക്രിക്കറ്റ് മൈതാനങ്ങളിൽ നിറഞ്ഞുനിന്നിരുന്ന താരം. ഇപ്പോൾ സംഗീത ലോകത്തെ മിന്നും താരം. ഹെൻറി ഒലോങ്ക എന്ന സിംബാബ്‌വെക്കാരനെ അത്ര പെട്ടെന്നൊന്നും മറക്കാനിടയില്ല കായികലോകം. ആദ്യം ക്രിക്കറ്റിലെ മിന്നൽപ്പിണർ, ഇപ്പോള്‍ ആർമി വേഷത്തിൽ മ്യൂസിക് ബാൻഡിനൊപ്പം! എന്താണ് ഒലോങ്കയുടെ ജീവിതത്തിൽ സംഭവിച്ചത്? 1999ലെ ഏകദിന ക്രിക്കറ്റ് ലോകകപ്പി‍ൽ ഇന്ത്യയുടെ അവസാന 3 വിക്കറ്റുകളും ഒറ്റ റൺ പോലും വഴങ്ങാതെ പിഴുതെടുത്ത് സിംബാബ്‌വെയ്ക്ക് അവിസ്മരണീയ ജയം സമ്മാനിച്ച പേസ് ബോളർ സൃഷ്ടിച്ച ഞെട്ടൽ ഇന്നും ഇന്ത്യക്കാരിൽനിന്നു വിട്ടുപോയിട്ടുണ്ടാകില്ല. മനോഹരമായി പിരിച്ചുവച്ച മുടിയിഴകൾ ക്രിക്കറ്റ് മൈതാനങ്ങളിലെ ഫാഷൻ ഐക്കണായും ഒലോങ്കയെ അടയാളപ്പെടുത്തി. എന്നാൽ ക്രിക്കറ്റിൽ നിന്ന് വിരമിച്ചതിനു ശേഷം അദ്ദേഹത്തിന്റെ മറ്റൊരു മുഖമാണ് ലോകം കണ്ടത്.