ഓഹരി നേരിട്ട് വാങ്ങേണ്ട, ഇങ്ങനെയും നേട്ടമുണ്ടാക്കാം

പൊതുമേഖലാ കമ്പനികളുടെയും പൊതുമേഖലാ ബാങ്കുകളുടെയും  ഓഹരികൾ വാങ്ങണമെന്നുണ്ടെങ്കിലും ഏതു ഓഹരി വാങ്ങണമെന്ന സംശയത്തിലാണോ നിങ്ങൾ? നേരിട്ട് പൊതുമേഖല സ്ഥാപനങ്ങളുടെയോ, ബാങ്കുകളുടെയോ ഓഹരികൾ വാങ്ങാതെ തന്നെ അവയിൽ നിന്ന് ലാഭമുണ്ടാക്കാൻ ഇ ടി എഫുകൾ സഹായിക്കും. ഒരു മേഖലയിലെ പല നല്ല കമ്പനികളെയും ഒരുമിച്ച് ചേർത്ത് 'ഒരു കുട്ടയിൽ ഇട്ടാൽ' അതിനെ ഒരു ഇ ടി എഫ് എന്നു വിളിക്കാം. ഉദാഹരണത്തിന് പൊതുമേഖലാ ബാങ്കുകളുടെ ഓഹരികൾ  എല്ലാം കൂടി ഒരുമിച്ചു വാങ്ങണമെങ്കിൽ നമുക്ക്  PSUBNKBEES എന്ന ഇ ടി എഫ് വാങ്ങാം. നിപ്പോൺ നൽകുന്ന ഇ ടി എഫ് ആണ് ഇത്. ഇതുപോലെ ഐ സി ഐ സി ഐയുടെ പൊതുമേഖലാ ബാങ്ക് ഇ ടി എഫ് ആണ് PSUBNKIETF എന്നത്. പല പൊതുമേഖലാ ബാങ്കുകളെയും ഒരുമിച്ചു വാങ്ങുന്ന ഫലമാണ് ഈ ഇ ടി എഫ് വാങ്ങുമ്പോൾ നമുക്ക് ലഭിക്കുന്നത്. PSUBANKADD , KOTAKPSUBK , HDFCPSUBK എന്നിവയും പൊതുമേഖലാബാങ്കുകളുടെ ഇ ടി എഫുകളാണ്.

അതുപോലെ  പൊതുമേഖലാ സ്ഥാപനങ്ങളുടെ ഒരു ഇ ടി എഫ് ആണ് CPSEETF . പല പൊതുമേഖലാ സ്ഥാപനങ്ങളെയും ഈ ഇ ടി എഫിലൂടെ നമുക്ക് ഒരുമിച്ചു വാങ്ങാം. ഇ ടി എഫുകളുടെ വില ഉയരുമ്പോൾ നമുക്ക് അവയെ വിറ്റു ലാഭമെടുക്കാം. ഇങ്ങനെ ഒരു ഓഹരി പ്രത്യേകമായി വാങ്ങാതെ ആ മേഖലയിലെ എല്ലാ നല്ല കമ്പനികളുടെ ഓഹരികളെയും നമുക്ക് ഇ ടി എഫ് വഴി വാങ്ങി നേട്ടം കൊയ്യാം. ഓഹരികൾ വാങ്ങുന്ന പോലെ തന്നെയാണ് ഇ ടി എഫുകള്‍ വാങ്ങുന്നത്. ഓഹരികൾ വിൽക്കുന്ന പോലെ തന്നെ അവ വിൽക്കാനും സാധിക്കും.