‘ഹാപ്പി ബർത്ത്ഡേ മൈ പേഴ്‌സൻ’: വീണ്ടും അഭ്യൂഹങ്ങളിൽ രാഹുലിനൊപ്പം ആദിയ!

ബെംഗളൂരു∙ ഇന്ത്യൻ ക്രിക്കറ്റിലെ യുവതാരങ്ങളിൽ ശ്രദ്ധേയനായ കെ.എൽ. രാഹുലിന് ഇന്ന് 28–ാം ജന്മദിനം. ദേശീയ ടീമിലെ സഹതാരങ്ങൾ ഉൾപ്പെടെ ജന്മദിനാംശസകൾ അറിയിച്ച് രംഗത്തെത്തിയെങ്കിലും ഏവരുടെയും ശ്രദ്ധ നേടിയത് ബോളിവുഡ് താരം ആദിയ ഷെട്ടിയാണ്. രാഹുലുമായി പ്രണയത്തിലാണെന്ന് അഭ്യൂഹങ്ങളിൽ നിറഞ്ഞുനിൽക്കുന്ന അതേ ആദിയ ഷെട്ടി തന്നെ. പ്രശസ്ത ബോളിവുഡ് നടൻ സുനിൽ ഷെട്ടിയുടെ മകൾ കൂടിയാണ് ആദിയ. രാഹുലിന് ആശംസകൾ നേർന്ന് ആദിയ ഇന്‍സ്റ്റഗ്രാമിൽ പോസ്റ്റ് ചെയ്ത കുറിപ്പിലെ ‘അടുപ്പ’മാണ് ആരാധകർക്കിടയിൽ ചർച്ചയായത്.

‘ഹാപ്പി ബർത്ഡേ, മൈ പേർസൻ’ എന്നായിരുന്നു ഹൃദയത്തിന്റെ ഇമോജി സഹിതം ആദിയ ഷെട്ടിയുടെ കുറിപ്പ്. രാഹുലിനെ ടാഗും ചെയ്തു. ഇതിനു പിന്നാലെ മൂന്ന് ഹൃദയങ്ങളുടെ ഇമോജികൾ ചേർത്തുവച്ചായിരുന്നു രാഹുലിന്റെ മറുപടി ട്വീറ്റ്. ആദിത്യ ഷെട്ടിയുെട ആശംസാ പോസ്റ്റ് ടെന്നിസ് താരം സാനിയ മിർസ, ചലച്ചിത്രതാരം ഹ്യൂമ ഖുറേഷി തുടങ്ങിയവർ ലൈക്ക് ചെയ്തിട്ടുണ്ട്.

വിഖ്യാതമായ ഒരു ബോളിവുഡ് ചിത്രത്തിലെ രംഗം ഇരുവരും ചേർന്ന് അവതരിപ്പിക്കുന്ന ഒരു വിഡിയോ രാഹുൽ ട്വീറ്റ് ചെയ്തതോടെയാണ് ഗോസിപ്പ് കോളങ്ങളിൽ ആദ്യമായി ഇരുവരുടെയും പേരു വരുന്നത്. പ്രണയത്തിലാണെന്ന അഭ്യൂഹങ്ങൾ ശക്തമായ തുടരുമ്പോഴും ഇതേക്കുറിച്ച് ഇരുവരും ഔദ്യോഗികമായി ഇതുവരെ പ്രതികരിച്ചിട്ടില്ല. അതിനിടെ, രാഹുലുമായി പ്രണയത്തിലാണെന്ന് നേരത്തേമുതൽ അഭ്യൂഹങ്ങളിൽ ഇടംപിടിച്ച മോഡൽ ആകാൻഷ രഞ്ജൻ കപൂറും താരത്തിന് ഹൃദ്യമായ ആശംസകൾ നേർന്നിട്ടുണ്ട്. ‘ബെസ്റ്റ് ഫ്രണ്ട്’ എന്ന ലേബലോടെയാണ് ആകാൻഷയുടെ ആശംസ. ഇരുവരുമൊത്തുള്ള ചിത്രവും പങ്കുവച്ചിട്ടുണ്ട്.

2014ൽ ഇന്ത്യൻ ജഴ്സിയിൽ അരങ്ങേറിയ രാഹുൽ ഇപ്പോഴത്തെ താരങ്ങളിൽ ഏറ്റവും ശ്രദ്ധേയനാണ്. ഏതു ഫോർമാറ്റിനും അനുയോജ്യനാണെന്നതാണ് രാഹുലിനെ വ്യത്യസ്തനാക്കുന്ന പ്രധാന ഘടകം. ആറു വർഷം പിന്നിട്ട രാജ്യാന്തര കരിയറിൽ ഇതുവരെ ഇന്ത്യയ്ക്കായി 36 ടെസ്റ്റുകളിലും 32 ഏകദിനങ്ങളിലും 42 ട്വന്റി20കളിലും‍ കളിച്ചു. ടെസ്റ്റിൽ അഞ്ച് സെഞ്ചുറിയും 11 അർധസെഞ്ചുറിയും സഹിതം 34.58 ശരാശരിയിൽ 2006 റൺസ് നേടി. ഏകദിനത്തിൽ നാല് സെഞ്ചുറിയും ഏഴ് അർധസെഞ്ചുറിയും സഹിതം 47.65 ശരാശരിയിൽ 1239 റൺസും ട്വന്റി20യിൽ രണ്ടു സെഞ്ചുറിയും 11 അർധസെഞ്ചുറിയും സഹിതം 45.65 ശരാശരിയിൽ 1461 റണ്‍സും നേടി. ധോണിയുടെ പകരക്കാരനായി വാഴ്ത്തപ്പെട്ട യുവതാരം ഋഷഭ് പന്ത് പരാജയപ്പെട്ടപ്പോൾ വിക്കറ്റ് കീപ്പറുടെ റോളിലും തിളങ്ങി.

അതേസമയം, മഹാരാഷ്ട്രയിൽനിന്നുള്ള ബോളിവുഡ് നടിയാണ് ഇരുപത്തേഴുകാരിയായ ആദിയ ഷെട്ടി. ജാക്കി ഷ്റോഫ് നായകനായി 1983ൽ പുറത്തിറങ്ങിയ ഹീറോയുടെ അതേപേരിലുള്ള 2015ലെ റീമേക്കിൽ നായികയായാണ് ആദിയ ഷെട്ടി ബോളിവുഡിൽ അരങ്ങേറിയത്. പുതുമുഖ താരം സൂരജ് പഞ്ചോളിയായിരുന്നു നായകൻ. ഈ ചിത്രത്തിലെ അഭിനയത്തിന് പുതുമുഖ നടിക്കുള്ള ഫിലിംഫെയർ പുരസ്കാരത്തിന് നോമിനേഷൻ ലഭിച്ചു. മുബാറക്കാൻ (2017), മോത്തിച്ചോർ ചക്നചോർ (2019) തുടങ്ങിയവയാണ് മറ്റ് പ്രധാന ചിത്രങ്ങൾ.

English Summary: KL Rahul All Hearts For Athiya Shetty's "My Person" Birthday Wish