അട്ടിമറികള്‍ തുടരുന്നു; ഇംഗ്ലണ്ട്, ന്യൂസീലൻഡ്, പാക്കിസ്ഥാൻ നിൽക്കണോ പോകണോ?

അട്ടിമറി വിജയങ്ങളും ലാസ്റ്റ് ഓവർ ത്രില്ലറുകളും പതിവായ ട്വന്റി20 ലോകകപ്പ് 9–ാം എഡിഷൻ ആദ്യ പകുതി പിന്നിടുമ്പോൾ വമ്പൻ ടീമുകളായ ഇംഗ്ലണ്ടും ന്യൂസീലൻഡും പാക്കിസ്ഥാനും സൂപ്പർ 8 സാധ്യത നിലനിർത്താനുള്ള പോരാട്ടത്തിലാണ്. ഡി ഗ്രൂപ്പിലെ ആദ്യ 3 മത്സരങ്ങളും ജയിച്ച ദക്ഷിണാഫ്രിക്ക മാത്രമാണ് സൂപ്പർ 8ൽ ഇടം ഉറപ്പിച്ച ഏക ടീം. ബി ഗ്രൂപ്പിൽ 3 തോൽവികളുമായി ഒമാൻ ടൂർണമെന്റിൽനിന്നു പുറത്താവുകയും ചെയ്തു. ടൂർണമെന്റിൽ ബാക്കിയുള്ള ടീമുകളുടെ സൂപ്പർ 8 സാധ്യത ഇങ്ങനെ.

ഗ്രൂപ്പ് എ

ആദ്യ രണ്ടു മത്സരങ്ങളും ജയിച്ച് 4 പോയിന്റ് വീതമുള്ള ഇന്ത്യയും യുഎസ്എയുമാണ് ഗ്രൂപ്പ് എയി‍ൽ നിന്ന് ഏറക്കുറെ സൂപ്പർ 8 ഉറപ്പിച്ച ടീമുകൾ. ഒരു മത്സരം കൂടി ജയിച്ചാൽ ഇരു ടീമുകളും സൂപ്പർ 8ലേക്ക് യോഗ്യത നേടും. ഇനി അടുത്ത രണ്ടു മത്സരങ്ങളും തോൽക്കുകയോ മഴമൂലം ഉപേക്ഷിക്കുകയോ ചെയ്താലും ഇരു ടീമുകൾക്കും നെറ്റ് റൺറേറ്റിന്റെ ബലത്തിൽ സൂപ്പർ 8 സാധ്യതയുണ്ട്. മൂന്നു മത്സരങ്ങളിൽ നിന്ന് ഒരു ജയം മാത്രമുള്ള പാക്കിസ്ഥാനും കാനഡയും യഥാക്രമം മൂന്നും നാലും സ്ഥാനങ്ങളിലാണ്. അടുത്ത മത്സരം വൻ മാർജിനിൽ ജയിച്ചാലേ ഇരു ടീമുകൾക്കും സൂപ്പർ 8 സാധ്യതയുള്ളൂ. ആദ്യ 2 മത്സരങ്ങളും തോറ്റ് അഞ്ചാമതുള്ള അയർലൻഡിനും ബാക്കി രണ്ടു മത്സരങ്ങൾ വൻ മാർജിനിൽ ജയിച്ചാൽ സൂപ്പർ 8ൽ പ്രതീക്ഷ വയ്ക്കാം. ജയത്തോടൊപ്പം  നെറ്റ് റൺറേറ്റ് കൂടി പരിഗണിച്ചാകും മൂന്നു ടീമുകളുടെയും സൂപ്പർ 8 സാധ്യത തീരുമാനിക്കപ്പെടുക. 

ഗ്രൂപ്പ് ബി

ആദ്യ മത്സരം മഴമൂലം ഉപേക്ഷിക്കുകയും അടുത്ത മത്സരത്തിൽ ഓസ്ട്രേലിയയോടു തോൽക്കുകയും ചെയ്ത ഇംഗ്ലണ്ട് പുറത്താകലിന്റെ വക്കിലാണ്. നിലവിൽ 5 പോയിന്റുമായി ഒന്നാം സ്ഥാനത്തുള്ളത് സ്കോ‌ട്‌ലൻ‌‍‍ഡാണ്. അവസാന മത്സരത്തിൽ ഓസ്ട്രേലിയയെ തോൽപിച്ചാൽ സ്കോട്‌ലൻഡിനു സൂപ്പർ 8ൽ കടക്കാം. ഇനി തോറ്റാലും മറ്റു ടീമുകളുടെ മത്സരഫലത്തെ അടിസ്ഥാനപ്പെടുത്തി സ്കോട്‌ലൻ‌ഡിന് സാധ്യതയുണ്ട്. 2 മത്സരങ്ങളിൽ‌ നിന്ന് 4 പോയിന്റുമായി രണ്ടാം സ്ഥാനത്തുള്ള ഓസ്ട്രേലിയയ്ക്ക് ബാക്കിയുള്ള രണ്ടു മത്സരങ്ങളിൽ ഒരെണ്ണം ജയിച്ചാൽ സൂപ്പർ 8ൽ കടക്കാം. 2 മത്സരങ്ങളിൽ നിന്ന് ഒരു ജയമുള്ള നമീബിയയാണ് മൂന്നാമത്. ബാക്കിയുള്ള രണ്ടു മത്സരങ്ങളും ജയിച്ചാലേ നമീബിയയ്ക്ക് സാധ്യതയുള്ളു. അടുത്ത 2 മത്സരങ്ങളും ജയിച്ചാലും നെറ്റ് റൺറേറ്റിൽ‌ സ്കോട്‌ലൻഡിനെ മറികടന്നാലേ അവർക്കു സൂപ്പർ 8 സാധ്യതയുള്ളൂ. 3 മത്സരങ്ങളും തോറ്റ ഒമാൻ ഇതിനോടകം പുറത്തായി.

ഗ്രൂപ്പ് സി

ആദ്യ 2 മത്സരങ്ങൾ ജയിച്ച അഫ്ഗാനിസ്ഥാൻ, വെസ്റ്റിൻഡീസ് ടീമുകളാണ് ഗ്രൂപ്പ് സിയിൽ ഒന്നും രണ്ടും സ്ഥാനങ്ങളി‍ൽ. ഓരോ മത്സരം വീതം ജയിച്ചാൽ ഇരുടീമുകളും സൂപ്പർ 8 ഉറപ്പിക്കും. അഫ്ഗാനിസ്ഥാനോടേറ്റ അപ്രതീക്ഷിത തോൽവിയോടെ അഞ്ചാം സ്ഥാനത്തായ ന്യൂസീലൻഡിന് അടുത്ത 3 മത്സരങ്ങളും വൻ മാർജിനിൽ ജയിച്ചാൽ മാത്രമേ സാധ്യതയുള്ളൂ. ഒരു മത്സരംകൂടി തോറ്റാൽ അവർ പുറത്താകുമെന്ന അവസ്ഥയാണ്. 3 മത്സരങ്ങളിൽ നിന്ന് ഒരു ജയമുള്ള യുഗാണ്ടയ്ക്കും രണ്ടു മത്സരവും തോറ്റ പാപുവ ന്യൂഗിനിക്കും ഇനിയുള്ള മത്സരങ്ങൾ ജയിച്ചാലും അഫ്ഗാൻ, വെസ്റ്റിൻഡീസ് ടീമുകൾ ബാക്കിയുള്ള മത്സരങ്ങൾ തോറ്റാൽ മാത്രമേ സൂപ്പർ 8ലേക്ക് വിദൂരസാധ്യതയെങ്കിലുമുള്ളൂ.

ഗ്രൂപ്പ് ഡി

ഗ്രൂപ്പ് ഡിയിൽ മൂന്ന് മത്സരങ്ങളിൽനിന്ന് 3 ജയവുമായി സൂപ്പർ 8 ഉറപ്പിക്കുന്ന ആദ്യ ടീമായി ദക്ഷിണാഫ്രിക്ക. 2 മത്സരങ്ങളിൽനിന്ന് 2 വീതം പോയിന്റുള്ള ബംഗ്ലദേശും നെതർലൻഡ്സുമാണ് സൂപ്പർ 8 സാധ്യതയ്ക്കായി മത്സരിക്കുന്ന മറ്റു ടീമുകൾ. നാളെ ഇരുടീമുകളും നേർക്കുനേർ വരുമ്പോൾ വിജയികൾ ഏറക്കുറെ സൂപ്പർ 8 ഉറപ്പിക്കും. ആദ്യ 2 മത്സരങ്ങളും തോറ്റ ശ്രീലങ്ക ഗ്രൂപ്പിൽ അവസാന സ്ഥാനത്താണ്. അടുത്ത 2 മത്സരങ്ങളും ജയിച്ചാലും ബംഗ്ലദേശ്, നെതർലൻഡ്സ് ടീമുകളുടെ ബാക്കിയുള്ള മത്സരഫലവും നെറ്റ് റൺറേറ്റും പരിഗണിച്ചാകും ശ്രീലങ്കയുടെ സൂപ്പർ 8 സാധ്യത. ആദ്യ മത്സരം തോറ്റ നേപ്പാൾ നിലവിൽ നാലാം സ്ഥാനത്താണ്. അടുത്ത 3 മത്സരങ്ങളും ജയിച്ചാൽ നേപ്പാളിനും സൂപ്പർ 8 പ്രതീക്ഷ വയ്ക്കാം.