ഐഎസ്എലിൽ ബ്ലാസ്റ്റേഴ്സിന്റെ മുന്നേറ്റം; ഗോളടിച്ച് ലൂണ, രണ്ടാം മത്സരവും സ്വന്തമാക്കി

കൊച്ചി ∙ തുടർച്ചയായ രണ്ടാം വിജയവുമായി ഐഎസ്എലിൽ കേരളാ ബ്ലാസ്റ്റേഴ്സിന്റെ മുന്നേറ്റം. ജംഷഡ്‌പുർ എഫ്സിക്കെതിരായ പോരാട്ടത്തിൽ എതിരില്ലാത്ത ഒരു ഗോളിനാനാണു ബ്ലാസ്റ്റേഴ്‍‌സിന്റെ ജയം. ഇരുടീമുകളും ഒപ്പത്തിനൊപ്പം പൊരുതിയ മത്സരത്തിനാണ് കൊച്ചി വേദിയായത്.

ആക്രമണത്തിന് പ്രധാന്യം നൽകി ഇരുടീമുകളും കളം നിറഞ്ഞു. 74–ാം മിനിറ്റിൽ ക്യാപ്റ്റൻ അഡ്രിയാൻ ലൂണയാണു ബ്ലാസ്റ്റേഴ്സിനായി ഗോൾ തൊടുത്തത്. പകരക്കാരനായി 62–ാം മിനിറ്റിൽ എത്തിയ ദിമിത്രിയോസ് ഗോളിനുള്ള വഴിയൊരുക്കി. ബെംഗളൂരു എഫ്സിയെ തോൽപ്പിച്ച ടീമിൽനിന്ന് മാറ്റങ്ങളില്ലാതെയാണ് ബ്ലാസ്റ്റേഴ്സ് ഇറങ്ങിയത്.

ലൂണയും പെപ്രയും മുന്നേറ്റ നിരയെ നയിച്ചപ്പോൾ ഡയസൂക സക്കായിയും ജീക്‌സണും ഡാനിഷും മുഹമ്മദ് എയ്‌മാനുമാണ് മധ്യനിരയിൽ അണിനിരന്നത്. കഴിഞ്ഞ കളിയിൽ മികവു പുലർത്തിയ സച്ചിൻ ഇത്തവണയും ബ്ലാസ്റ്റേഴ്‌സിന്റെ ഗോൾവല കാത്തു.

English Summary: ISL 2023 : Kerala Blasters won against Jamshedpur FC