പരിശീലക സ്ഥാനം വിട്ടേക്കുമെന്ന് അർജന്റീന കോച്ച് ലയണൽ സ്കലോനി

റിയോ ഡി ജനീറോ ∙ പരിശീലക സ്ഥാനം രാജിവയ്ക്കുന്നതിനെക്കുറിച്ചു താൻ ചിന്തിച്ചു തുടങ്ങിയതായി അർജന്റീന കോച്ച് ലയണൽ സ്കലോനി. ബ്രസീലിനെ 1–0ന് തോൽപിച്ച അർജന്റീനയുടെ മത്സരത്തിനു ശേഷം മാധ്യമങ്ങളോടു സംസാരിക്കവേയാണ് ചോദ്യങ്ങൾക്കു മറുപടിയായല്ലാതെ തന്നെ സ്കലോനി തുറന്നടിച്ചത്. ഈ ടീം തുടർച്ചയായി വിജയങ്ങൾ നേടുന്നു. ഈ വിജയങ്ങൾ ആവർത്തിക്കുകയെന്നത് വലിയ ഉത്തരവാദിത്തമാണ്. മത്സരത്തിനിടെ ഞാൻ കുറെ ആലോചിച്ചു. ധാരാളം ഊർജമുള്ള ഒരു പരിശീലകനെയാണ് അർജന്റീനയ്ക്ക് ഇനി വേണ്ടത്. 

ഞാൻ ഇക്കാര്യം ഫുട്ബോൾ അസോസിയേഷൻ പ്രസിഡന്റുമായും പിന്നീടു കളിക്കാരുമായും സംസാരിക്കും. – നാൽപത്തിയഞ്ചുകാരനായ സ്കലോനി പറഞ്ഞു. 2018ൽ അർജന്റീനയുടെ പരിശീലകനായ സ്കലോനിയുടെ കീഴിലാണ് അർജന്റീന കോപ്പ അമേരിക്ക, ലോകകപ്പ് കിരീടങ്ങൾ നേടിയത്. 1986 ലോകകപ്പിനു ശേഷം അർജന്റീനയ്ക്കു രണ്ട് പ്രധാന രാജ്യാന്തര ട്രോഫികൾ നേടിക്കൊടുത്ത സ്കലോനി  രാജിവയ്ക്കുമെന്നു   പ്രതീക്ഷിക്കുന്നില്ലെന്ന് ടീമംഗം ക്രിസ്റ്റ്യൻ റൊമേറോ പറഞ്ഞു.