നേഷൻസ് ലീഗ്: സ്പെയിനിന് ജയം, പോർച്ചുഗലിന് സമനില

മഡ്രിഡ് ∙ സെർബിയയ്ക്കെതിരെ 3–0ന്റെ തകർപ്പൻ ജയവുമായി സ്പെയിൻ നേഷൻസ് ലീഗ് ഫുട്ബോളിന്റെ ക്വാർട്ടർ ഫൈനൽ ഉറപ്പിച്ചു. ടൂ‍ർണമെന്റിൽ സ്പെയിനിന്റെ തുടർച്ചയായ മൂന്നാം ജയമാണിത്. അയ്മെറിക് ലപോർട്ടെ (5–ാം മിനിറ്റ്), അൽവാരോ മൊറാത്ത (65), അലക് ബയ്ന (77) എന്നിവരാണ് സ്പാനിഷ് ടീമിനു വേണ്ടി ലക്ഷ്യം കണ്ടത്.

മറ്റൊരു മത്സരത്തിൽ സൂപ്പർ താരം ക്രിസ്റ്റ്യാനോ റൊണാൾഡോയുടെ പോർച്ചുഗലിനെ സ്കോട്‌ലൻഡ് ഗോൾരഹിത സമനിലയിൽ പിടിച്ചുകെട്ടി. ടൂർണമെന്റിലെ ആദ്യ 3 മത്സരങ്ങളും ജയിച്ച പോർച്ചുഗൽ ഗ്രൂപ്പിൽ 10 പോയിന്റുമായി ഒന്നാം സ്ഥാനത്താണ്. ഇന്നലെ പുലർച്ചെ നടന്ന ക്രൊയേഷ്യ– പോളണ്ട് മത്സരം 3–3 സമനിലയിൽ പിരിഞ്ഞു.