ബാസ്കറ്റ് ഇതിഹാസം എ‍ൽഗൻ ബെയ്‌ലർ അന്തരിച്ചു

ന്യൂയോർക്ക് ∙ യുഎസ് ബാസ്കറ്റ്ബോൾ ഇതിഹാസം എൽഗൻ ബെയ്‌ലർ (86) അന്തരിച്ചു. എൻബിഎ ടീമായ ലൊസാഞ്ചലസ് ലേക്കേഴ്സിനായി 14 സീസണുകളിൽ കോർട്ടിലിറങ്ങി. ഒരു ചാംപ്യൻഷിപ് പോലും നേടാനാകാതെ പോയ മികച്ച താരങ്ങളുടെ പട്ടികയിൽ അദ്ദേഹത്തിന്റെ പേരുണ്ട്. 1959ൽ എൻബിഎയിലെ ഏറ്റവും മികച്ച പുതുമുഖ താരമായി തിരഞ്ഞെടുക്കപ്പെട്ടു. ആറടി അഞ്ചിഞ്ച് ഉയരക്കാരനായ ബെയ്‌ലർ എൻബിഎ ചരിത്രത്തിലെ ഏറ്റവും മികച്ച ഷൂട്ടർമാരിലൊരാളായിട്ടാണ് അറിയപ്പെടുന്നത്. എൻബിഎ ഫൈനൽസിൽ ഒരു മത്സരത്തിൽ ഏറ്റവും കൂടുതൽ പോയിന്റുകൾ നേടിയതിന്റെ റെക്കോർഡ് ബെയ‍്‍ലറുടെ പേരിലാണ്. യുഎസിലെ പൗരാവകാശ സമരങ്ങളിൽ സജീവസാന്നിധ്യവുമായിരുന്നു ബെയ്‌ലർ.

Content Highlights: Basketball player Elgin Baylor passes away