പ്രൈം വോളിബോൾ: കാലിക്കറ്റ് സെമിയിൽ

കൊച്ചി∙ പ്രൈം ലീഗ് വോളിബോളിൽ ബെംഗളൂരു ടോർപ്പിഡോസിനെതിരെ പരാജയപ്പെട്ടെങ്കിലും കാലിക്കറ്റ് ഹീറോസ് സെമിയിൽ. 5 സെറ്റ് നീണ്ട മത്സരത്തിൽ 2 സെറ്റ് സ്വന്തമാക്കിയതോടെയാണ് കാലിക്കറ്റ് സെമി ഉറപ്പിച്ചത്. 

ആദ്യ രണ്ടു സെറ്റ് പിന്നിട്ടുനിന്ന ശേഷം തിരിച്ചടിച്ച് ഒപ്പമെത്തിയ കാലിക്കറ്റ് ഹീറോസിനെ അഞ്ചാം സെറ്റിലാണു ബെംഗളൂരു മറികടന്നത്. സ്കോർ: 15–11, 15–11, 13–15, 10–15, 15–14. മികച്ചു കളിച്ചിട്ടും തുടരെ വരുത്തിയ പിഴവുകളാണു കാലിക്കറ്റിന് ആദ്യ രണ്ടു സെറ്റുകൾ നഷ്ടമാക്കിയത്. ആവേശം ആകാശം മുട്ടിയ അഞ്ചാം സെറ്റിൽ ഒപ്പത്തിനൊപ്പമാണു പോയിന്റ് നില മുന്നേറിയത്. 

ബെംഗളൂരുവിന്റെ മലയാളി താരം ഐബിൻ ജോസ് ആണു കളിയിലെ താരം. ഇന്ന് ആതിഥേയരായ കൊച്ചി ബ്ലൂ സ്പൈക്കേഴ്സ് മുംബൈ മെറ്റിയോസിനെ നേരിടും. വൈകിട്ട് 7നു കടവന്ത്ര രാജീവ് ഗാന്ധി ഇൻഡോർ സ്റ്റേഡിയത്തിലാണു മത്സരം. 

കൊച്ചി  മുംബൈയ്ക്കെതിരെ ഒരു സെറ്റെങ്കിലും ജയിച്ചാൽ ബെംഗളൂരു സെമിയിൽ കടക്കും. മുംബൈയ്ക്കു സെമിയിലെത്താൻ ഇന്ന് അഞ്ച് സെറ്റ് നേടി സമ്പൂർണ ജയം നേടണം.

English Sumary : Calicut enters Prime Volleball semi match