കാൻഡിഡേറ്റ്സ് ചെസ്: ഗുകേഷ് മുന്നിൽ

ടൊറന്റോ (കാനഡ) ∙ കാൻഡിഡേറ്റ്സ് ചെസ് ചാംപ്യൻഷിപ്പിൽ മുന്നിലെത്തി ഇന്ത്യൻ താരം ഡി.ഗുകേഷ്. അഞ്ചാം റൗണ്ടിൽ, 6 മണിക്കൂർ നീണ്ട മാരത്തൺ പോരാട്ടത്തിൽ അസർബൈജാൻ താരം നിജാത് അബാസോവിനെ തോൽപിച്ചാണ് റഷ്യയുടെ യാൻ നീപോംനീഷിക്കൊപ്പം ഗുകേഷ് ഒന്നാം സ്ഥാനത്തേക്കുയർന്നത്. ഇരുവർക്കും 3.5 പോയിന്റ് വീതമുണ്ട്. 3 പോയിന്റുള്ള അമേരിക്കയുടെ ഫാബിയാനോ കരുവാനയാണ് രണ്ടാമത്. ഇന്നലെ നടന്ന മറ്റു മത്സരങ്ങളിൽ ഇന്ത്യൻ താരം ആർ.പ്രഗ്നാനന്ദ, നീപോംനീഷിയെ സമനിലയിൽ പിടിച്ചപ്പോൾ അമേരിക്കയുടെ ഹികാരു നകാമുറ, ഫ്രാൻസ് താരം അലി റേസ ഫിറൂസ്ജയെ തോൽപിച്ചു. വിദിത് ഗുജറാത്തി– കരുവാന മത്സരവും സമനിലയിൽ പിരിഞ്ഞു.