ഹോക്കി: ഇന്ത്യ‌‌ ‌വീണ്ടും വീണു

പെർത്ത് ∙ ഉജ്വല സേവുകളുമായി കളംനിറഞ്ഞ മലയാളി താരം പി.ആർ.ശ്രീജേഷിനും ഇന്ത്യയെ രക്ഷിക്കാനായില്ല. ഓസ്ട്രേലിയയ്ക്കെതിരെ ഹോക്കി പരമ്പരയിലെ മൂന്നാം മത്സരത്തിൽ ഇന്ത്യൻ പുരുഷ ടീമിന് 2–1ന്റെ തോൽവി. 41–ാം മിനിറ്റിൽ ജുഗ്‍രാജ് സിങ്ങിലൂടെ ലീ‍ഡ് നേടിയ ശേഷമാണ് ഇന്ത്യ മത്സരം കൈവിട്ടത്. ആദ്യ 2 മത്സരങ്ങളും അനായാസം ജയിച്ച ഓസ്ട്രേലിയ 5 മത്സര പരമ്പരയിൽ 3–0ന് മുന്നിലെത്തി. മത്സരത്തി‍ൽ 12 പെനൽറ്റി കോർണറുകൾ വഴങ്ങിയ ഇന്ത്യയെ വലിയ നാണക്കേടിൽ നിന്നു രക്ഷിച്ചത് ശ്രീജേഷിന്റെ മികവാണ്.

ഓസ്ട്രേലിയയുടെ ആക്രമണ നിരയും ഇന്ത്യയുടെ പ്രതിരോധ നിരയും തമ്മിലുള്ള പോരാട്ടമായിരുന്നു ഇന്നലത്തെ മത്സരം. ആദ്യ 2 മത്സരങ്ങളിലും പൊരുതാതെ കീഴടങ്ങിയ ഇന്ത്യൻ ടീം ഇന്നലെ ഓസീസിന് കടുത്ത വെല്ലുവിളിയുയർത്തി. തുടർ ആക്രമണങ്ങൾക്കൊട‌ുവിൽ ആദ്യ ക്വാർട്ടറിൽ 6 പെനൽറ്റി കോർണറുകൾ നേടിയെടുത്ത ആതിഥേയർക്ക് ശ്രീജേഷിന്റെ പ്രതിരോധക്കോട്ട മറികടക്കാനായില്ല. 41–ാം മിനിറ്റിൽ പെനൽറ്റി കോർ‌ണറിലൂടെയായിരുന്നു ജുഗ്‍രാജ് സിങ്ങിന്റെ ഗോൾ. 

പിന്നാലെ ഇന്ത്യയുടെ പ്രതിരോധ പിഴവ് മുതലെട‌ുത്ത്, ജെറെമി ഹേവാർഡ് നേടിയ 2 ഗോളുകളിലൂടെ ഓസ്ട്രേലിയ മത്സരം തിരിച്ചുപിടിച്ചു (44, 49 മിനിറ്റുകൾ). എന്നാ‍ൽ തുടർന്ന് ലീഡുയർത്താനുള്ള അവരുടെ ശ്രമങ്ങൾ ഇന്ത്യൻ പ്രതിരോധത്തിൽ തട്ടിത്തകർന്നു.