ഇരട്ട സഹോദരിക്കെതിരെ മത്സരിക്കില്ല, ശ്രേയ മത്സരിച്ചത് സീനിയേഴ്സിനൊപ്പം.

സംസ്ഥാന സ്കൂൾ കായികമേളയിൽ സീനിയർ പെൺകുട്ടികളുടെ നടത്തത്തിനിടെയാണ് കൂട്ടത്തിലെ ‘ജൂനിയറിനെ’ എല്ലാവരും ശ്രദ്ധിച്ചത്. ജൂനിയർ വിഭാഗത്തിൽ മത്സരിക്കേണ്ട പാലക്കാട് പനങ്ങാട്ടിരി ആർപിഎംഎസ്എസിലെ യു. ശ്രേയ സീനിയർ വിഭാഗത്തിൽ പോരാട്ടത്തിനിറങ്ങാൻ ഒരു കാരണമുണ്ട്. മിനിറ്റുകളുടെ വ്യത്യാസത്തിൽ ചേച്ചിയായതിന്റെ പക്വത. ശ്രേയയുടെ ഇരട്ടസഹോദരി ശ്രദ്ധ മൂന്നു കിലോമീറ്റർ നടത്തത്തില്‍ ജൂനിയർ വിഭാഗത്തിൽ മത്സരിക്കുന്നുണ്ട്. അനുജത്തിക്കൊപ്പം മത്സരിക്കാന്‍ ആഗ്രഹമില്ലാത്തതുകൊണ്ട് സീനിയർ വിഭാഗത്തിലേക്കു മാറാൻ ശ്രേയ തീരുമാനിക്കുകയായിരുന്നു.