വേണം, വരണം... അണക്കര എയർസ്ട്രിപ്; ഇടുക്കിയിൽ എയർ സ്ട്രിപ്പിനായി പഠനം

ഇടുക്കിയിൽ എയർസ്ട്രിപ് സ്ഥാപിക്കുമെന്ന പ്രഖ്യാപനം വീണ്ടും ഉണ്ടായത് 2020 ലെ സംസ്ഥാന ബജറ്റിലാണ് . എയർ സ്ട്രിപ്പിനായി ജില്ലാ ആസ്ഥാനത്തോടു ചേർന്ന് മണിയാറൻകുടി പെരുങ്കാല മേഖലയാണ് പരിഗണിച്ചിട്ടുള്ളത്. കഴിഞ്ഞ സംസ്ഥാന ബജറ്റിൽ സാധ്യതാ പഠനത്തിനായി പ്രാഥമിക പഠനത്തിന് തുക അനുവദിച്ചിരുന്നു. തുടർന്ന് ഇതു സംബന്ധിച്ച പ്രവർത്തനങ്ങൾക്കായി റിട്ട. എയർ ഫോഴ്സ് ഓഫിസറെ ചുമതലപ്പെടുത്താൻ കാബിനറ്റിൽ തീരുമാനമായിരുന്നു. സാധ്യതാ പഠനത്തിനൊപ്പം സ്ഥലം ഏറ്റെടുക്കുന്നതിനുള്ള നടപടികൾ പുരോഗമിക്കുകയാണ്. 

ഇനി ഇടുക്കിക്ക് ശുഭയാത്ര
രാജ്യാന്തര നിലവാരമുള്ള വിനോദ സഞ്ചാര കേന്ദ്രങ്ങളായ ഇടുക്കിക്കും തേക്കടിക്കും മൂന്നാറിനും പുറമേ അനുബന്ധ കേന്ദ്രങ്ങളായി ഒട്ടേറെ ചെറുകിട സഞ്ചാര തീരങ്ങൾ ഇടുക്കിയിൽ ഉണ്ടെങ്കിലും യാത്രാ സൗകര്യ അപര്യാപ്തത വികസനത്തിന് തടസ്സമാണ്. ഗ്രാമീണ റോഡുകളിലൂടെ മാത്രം ബന്ധിച്ച ജില്ലയിലെ സഞ്ചാര കേന്ദ്രങ്ങളിലേക്കും ഗ്രാമങ്ങളിലേക്കും സ്വദേശികൾ പോലും കടന്നെത്തുന്നില്ല.

ടൂറിസത്തിന് ഒട്ടേറെ സാധ്യതകൾ ഉള്ള ഇടമലക്കുടി, മുല്ലക്കുടി, താന്നിക്കുടി, പാൽക്കുളംമേട് തുടങ്ങി ഒട്ടേറെ സ്ഥലങ്ങൾ മതിയായ റോഡ് സൗകര്യങ്ങൾ പോലും ഇല്ല. ഇടുക്കിയിലെ നിർദിഷ്ട വിമാനത്താവളം ഇത്തരം അറിയപ്പെടാത്ത വിനോദ സഞ്ചാര കേന്ദ്രങ്ങളുടെ അഭൂതപൂർവമായ വികസനത്തിന് വഴിയൊരുക്കും.

വേണം, വരണം...അണക്കര എയർസ്ട്രിപ്
കുമളി ∙ അണക്കര എയർ സ്ട്രിപ് എന്ന സങ്കൽപത്തിന് വീണ്ടും ചിറക് മുളയ്ക്കുമോ? സത്രം എയർസ്ട്രിപ്പിനും, സീ പ്ലെയിൻ സ്വപ്നത്തിനും വിലങ്ങുതടിയുമായി വനംവകുപ്പും മറ്റ് ചില തൽപരകക്ഷികളും രംഗത്ത് വരുമ്പോൾ ഇത്തരത്തിലൊരു പ്രശ്നവുമില്ലാത്ത അണക്കരയിൽ എയർ സ്ട്രിപ് സ്ഥാപിക്കണമെന്നാണ് വിവിധ മേഖലകളിൽ നിന്ന് ആവശ്യം ഉയരുന്നത്.

അണക്കര എയർസ്ട്രിപ്പിന്  പാരിസ്ഥിതിക പ്രശ്നങ്ങളോ മണ്ണിടിച്ചിലോ കുടിയിറക്കലോ വനം നശിപ്പിക്കലോ വേണ്ടിവരുന്നില്ല എന്നതാണ് പ്രത്യേകത. 16 വർഷം മുൻപാണ് അണക്കരയിൽ ചെറു വിമാനങ്ങൾ വന്നിറങ്ങാൻ സാധിക്കുന്ന തരത്തിൽ എയർ സ്ട്രിപ് നിർമിക്കുന്നതിനുള്ള പ്രാരംഭ നടപടികൾക്ക് തുടക്കമിട്ടത്.

കേന്ദ്ര വ്യോമയാന മന്ത്രാലയത്തിന്റെയും എയർപോർട്ട് അതോറിറ്റിയുടെയും പ്രതിരോധ വകുപ്പിന്റെയും അനുമതി ലഭിക്കുകയും വിവിധ സാങ്കേതിക പഠനങ്ങൾ ഉൾപ്പെടെ പൂർത്തിയാക്കുകയും ചെയ്തിരുന്നു. എയർ സ്ട്രിപ് നിർമിക്കാൻ 30-40 ഏക്കർ സ്ഥലം മാത്രമാണ് ആവശ്യമുള്ളത്. ഇത് നൽകാൻ തയാറാണെന്ന് അണക്കരയിലെ സ്വകാര്യ വ്യക്തി സമ്മതിക്കുകയും ചെയ്തിരുന്നു. എന്നിട്ടും പദ്ധതി മുടങ്ങുകയാണുണ്ടായത്. 

എന്താണ് എയർ സ്ട്രിപ് ?
ഒരു റൺവേ മാത്രം ഉള്ള ചെറു വിമാനത്താവളം ആണ് എയർ സ്ട്രിപ്. 25 മുതൽ 125 സീറ്റുകൾ വരെയുള്ള ചെറു വിമാനങ്ങൾക്കാണ് എയർസ്ട്രിപ്പുകളിൽ നിന്ന് സർവീസ് നടത്താൻ അനുമതി നൽകുന്നത്.