ബെൻസിന്റെ ഒഴുകുന്ന കൊട്ടാരം! 3 കോടിയുടെ മെയ്‌ബയിൽ നടി വിദ്യ ബാലൻ

സിനിമാതാരങ്ങൾക്കു വാഹനങ്ങൾ ആഡംബരത്തിന്റെയും പ്രൗഢിയുടെയും മറുവാക്കാണ്. അതുകൊണ്ടുതന്നെ വിലയിലും സൗകര്യങ്ങളിലും സുരക്ഷയിലും മുന്തിയവ തന്നെ സ്വന്തമാക്കാൻ ഭൂരിപക്ഷം  പേരും ശ്രമിക്കാറുണ്ട്. ഇപ്പോഴിതാ അത്തരമൊരു വാഹനം സ്വന്തമാക്കിയിരിക്കുകയാണ് ബോളിവുഡിന്റെ സ്വന്തം വിദ്യ ബാലൻ. മെഴ്‌സിഡീസ് മെയ്‌ബ എസ് 580 ആണ് താരത്തിന്റെ പുതിയ കൂട്ട്. എമറാൾഡ് ഗ്രീൻ നിറമാണ് ഈ ആഡംബര സെഡാനായി താരം തിരഞ്ഞെടുത്തിരിക്കുന്നത്. 2.70 കോടി രൂപ എക്സ് ഷോറൂം വില വരുന്ന വാഹനം ഓൺ റോഡെത്തുമ്പോൾ വില 3 കോടി രൂപയിലെത്തും. 

19 ഇഞ്ച് മോണോ ബ്ലോക്ക് അലോയ് വീലുകൾ, വെന്റിലേഷൻ, ഹീറ്റിങ്, കൂളിങ് എന്നിവ പ്രദാനം ചെയ്യുന്ന നാപ്പ ലെതർ റിയർ സീറ്റുകൾ, 12.8 ഇഞ്ച് പോർട്രൈറ്റ് ടച്ച് സ്ക്രീൻ ഇൻഫോടെയ്ൻമെൻറ് സിസ്റ്റം എന്നിങ്ങനെ ഫീച്ചറുകളുടെ ഒരു നീണ്ട നിര തന്നെ ഈ ആഡംബര സെഡാന് മെഴ്‌സിഡീസ് നൽകിയിട്ടുണ്ട്. 4.0 ലീറ്റർ ബൈ ടർബോ വി 8 മൈൽഡ് ഹൈബ്രിഡ് പെട്രോൾ എൻജിനാണ് കാറിന് കരുത്ത് പകരുന്നത്. വാഹനത്തിന്റെ പരമാവധി കരുത്ത് 496 ബി എച്ച് പി യും 700 എൻ എം ടോർക്കുമാണ്. 9 സ്പീഡ് ഓട്ടമാറ്റിക് ട്രാൻസ്മിഷനാണ്.

വിദ്യ ബാലന്റെ ഗാരിജിലെത്തിയ ആദ്യത്തെ മെഴ്‌സിഡീസ് ബെൻസ് വാഹനമാണ് മെയ്ബ 580.  2019 ൽ ബെൻസ് ഇ - ക്ലാസ് സെഡാനും അതിനു മുൻപ് ജി എൽ സി എസ് യു വിയും താരസുന്ദരി സ്വന്തമാക്കിയിരുന്നു. വിദ്യ ബാലന് പുറമെ ബോളിവുഡിൽ നിന്നും അനിൽ കപൂർ, കങ്കണ റണൗത്ത്, ഷാഹിദ് കപൂർ, കിയാര അദ്വാനി തുടങ്ങിയ താരങ്ങളും മെയ്ബ 580 സ്വന്തമാക്കിയിട്ടുണ്ട്.