അലീസിയ കീസിന്‍റെ സംഗീത പരിപാടി നാളെ ജിദ്ദയിൽ

ജിദ്ദ ∙ ജിദ്ദയിൽ നടക്കുന്ന ഫോർമുല 1 എസ്ടിസി സൗദി അറേബ്യൻ ഗ്രാൻഡ് പ്രി 2024ൽ അമേരിക്കൻ ഗായിക അലീസിയ കീസിന്‍റെ സംഗീത പരിപാടി അരേങ്ങറും. നാളെ ജിദ്ദ കോർണിഷ് സർക്യൂട്ട് മെയിൻ സ്റ്റേജിലാണ് പരിപാടി. ജിദ്ദയിൽ ഇതാദ്യമായി പരിപാടിക്ക് എത്തുന്ന ഗായിക ഇതിന് മുൻപ് രണ്ട് തവണ സൗദിയിൽ പരിപാടി അവതരിപ്പിച്ചിട്ടുണ്ട്. 

മാർച്ച് 8ന് രാജ്യാന്തര വനിതാ ദിനം ആഘോഷിക്കുന്നതിനായി, ജിദ്ദയിലെ ചരിത്ര ജില്ലയായ അൽബലദിൽ കീസ് വിമൻ ടു വിമൻ സംരംഭത്തിന്‍റെ മൂന്നാം പതിപ്പിന് ആതിഥേയത്വം വഹിക്കും. വൈവിധ്യമാർന്ന വീക്ഷണങ്ങൾ പങ്കുവെക്കാനും രാജ്യത്തിന്റെ പരിവർത്തനത്തിന് സ്ത്രീകളുടെ സുപ്രധാന സംഭാവനകൾ എടുത്തുകാട്ടാനും പരിപാടി ലക്ഷ്യമിടുന്നു. സൗദി അറേബ്യയിലേക്കുള്ള മുൻ സന്ദർശനങ്ങളെ പ്രതിഫലിപ്പിച്ചുകൊണ്ട്, ജിദ്ദയിൽ പ്രകടനം നടത്താനും പ്രചോദനം നൽകുന്ന സ്ത്രീകളുമായി ബന്ധപ്പെടാനുമുള്ള തന്‍റെ ആവേശം കീസ് പ്രകടിപ്പിച്ചു.