സൗദിയിൽ ഗതാഗത നിയമലംഘനങ്ങളിൽ പിഴ ഇളവ് 30 ദിവസത്തിനുള്ളിൽ പണം അടക്കുന്നവർക്ക് മാത്രം
![uae-car1 Image Credits: mrhighsky/Istockphoto.com](https://img-mm.manoramaonline.com/content/dam/mm/mo/global-malayali/gulf/images/2024/7/8/uae-car1.jpg?w=1120&h=583)
Mail This Article
റിയാദ് ∙ 30 ദിവസത്തിനുള്ളിൽ പണം അടക്കുന്നവർക്ക് മാത്രമാണ് ഗതാഗത നിയമ ലംഘനങ്ങളിൽ 25 ശതമാനം പിഴ ഇളവ് ലഭിക്കുകയെന്ന് സൗദി ട്രാഫിക് വകുപ്പ്. നിയമലംഘനത്തിന് എതിരെ പരാതിപ്പെടാനും ഇളവിന് അപേക്ഷിക്കാനുമുള്ള അവകാശം കുറ്റം ചുമത്തപ്പെട്ടയാൾക്കുണ്ടെന്നും ഇത് പരിഗണിച്ച് 25 ശതമാനം ഇളവ് വരുത്തിയാൽ ആ അറിയിപ്പ് ലഭിച്ച് 30 ദിവസത്തിനുള്ളിൽ പണമടക്കണമെന്നും ട്രാഫിക് നിയമത്തിലെ ‘ആർട്ടിക്കിൾ 75’ അനുശാസിക്കുന്നുണ്ട്. ഇളവ് വേണ്ടെങ്കിൽ 60 ദിവസത്തിനുള്ളിൽ പണം അടച്ചാൽ മതി.
ഇളവ് ലഭിച്ചാലും ഇല്ലെങ്കിലും പിഴ നിശ്ചിത സമയത്തിനുള്ളിൽ തന്നെ അടയ്ക്കണം. അല്ലെങ്കിൽ കാലയളവ് 90 ദിവസത്തേക്ക് നീട്ടാനുള്ള അഭ്യർഥന അബ്ഷിർ പ്ലാറ്റ്ഫോം വഴി നൽകണമെന്നും ട്രാഫിക് വകുപ്പ് വിശദീകരിച്ചു. എന്നാൽ കാലാവധി നീട്ടാൻ ആവശ്യപ്പെടാതെയും പിഴ അടക്കാതെയും ഇരുന്നാൽ വാഹനം പിടിച്ചെടുക്കലുൾപ്പടെയുള്ള മറ്റ് നിയമനടപടികൾ സ്വീകരിക്കും. ഏപ്രിൽ 18നാണ് സൗദിയിൽ ട്രാഫിക് പിഴകൾക്ക് വൻ ഇളവ് പ്രഖ്യാപിച്ചത്.