150 ദശലക്ഷം റിയാലിന്റെ നിക്ഷേപം; പുത്തൻ പദ്ധതികളുമായ് സൗദി ബ്രോഡ്കാസ്റ്റിങ് കോർപ്പറേഷൻ

ജിദ്ദ ∙ സൗദി അറേബ്യയിലെ മാധ്യമരംഗം വലിയൊരു മാറ്റത്തിന് സാക്ഷിയാകുന്നു. 150 ദശലക്ഷം റിയാലിന്റെ നിക്ഷേപത്തോടെ സൗദി ബ്രോഡ്കാസ്റ്റിങ് കോർപ്പറേഷൻ നിരവധി പുതിയ പദ്ധതികൾ ആരംഭിക്കുകയാണ്. വാർത്താവിതരണ മന്ത്രിയും കോർപ്പറേഷൻ ചെയർമാനുമായ സൽമാൻ ബിൻ യൂസഫ് അൽ ദോസരിയാണ് ഈ പദ്ധതികൾ പ്രഖ്യാപിച്ചത്.

ഏറ്റവും വലിയ പ്രഖ്യാപനം 6000 ചതുരശ്ര മീറ്ററിലുള്ള ഒരു അത്യാധുനിക സ്റ്റുഡിയോ നിർമ്മാണമാണ്. ഈ സ്റ്റുഡിയോയിൽ രാജ്യാന്തര നിലവാരത്തിലുള്ള പ്രോഗ്രാമുകൾ നിർമ്മിക്കാനും ഉൽപ്പാദനം വർദ്ധിപ്പിക്കാനും ലക്ഷ്യമിടുന്നു. ഒപ്പം, ആർട്ടിഫിഷ്യൽ ഇന്റലിജൻസ് പോലുള്ള സാങ്കേതികവിദ്യകളും ഉപയോഗിക്കും. "സിമ" എന്ന പേരിൽ ഒരു ഡിജിറ്റൽ ലൈബ്രറി പ്ലാറ്റ്‌ഫോം പുറത്തിറക്കുന്നതും പദ്ധതികളിൽ ഉൾപ്പെടുന്നു.

400,000 മണിക്കൂറിലധികം ആർക്കൈവ് മെറ്റീരിയലുകൾ ഇതിൽ ഉൾപ്പെടുത്തിയിട്ടുണ്ട്. കൂടാതെ, 200-ലധികം ബ്രോഡ്‌കാസ്റ്റിങ് സ്റ്റേഷനുകളെ ദൂരസ്ഥമായി നിയന്ത്രിക്കുന്നതിനുള്ള ഒരു സെന്റർ സ്ഥാപിച്ചിട്ടുണ്ട്. റേഡിയോ ആൻഡ് ടെലിവിഷൻ കോർപ്പറേഷന്റെ തിയേറ്ററുകൾ നവീകരിക്കുന്നതിനും പദ്ധതിയുണ്ട്. ഈ പദ്ധതികളിലൂടെ സൗദി അറേബ്യയുടെ മാധ്യമ രംഗം ലോകോത്തര നിലവാരത്തിലേക്ക് ഉയർത്തുകയാണ് ലക്ഷ്യം.