കേന്ദ്രമന്ത്രി പീയൂഷ് ഗോയൽ ഇന്ന് റിയാദിലെത്തും

റിയാദ് ∙ സൗദിയിൽ രണ്ടുദിന സന്ദർശനത്തിനായി കേന്ദ്ര വാണിജ്യ, വ്യവസായ മന്ത്രി പീയൂഷ് ഗോയൽ ഇന്ന് റിയാദിലെത്തും. സന്ദർശന വേളയിൽ, റിയാദിൽ നടക്കുന്ന എട്ടാമത് ഫ്യൂച്ചർ ഇൻവെസ്റ്റ്‌മെന്റ് ഇനിഷ്യേറ്റീവിൽ മന്ത്രി പങ്കെടുക്കും. ഇന്ത്യയും സൗദി അറേബ്യയും തമ്മിലുള്ള  തന്ത്രപരമായ പങ്കാളിത്തം കൂടുതൽ ആഴത്തിലാക്കാനും ഇരു രാജ്യങ്ങളും പരസ്പരമുള്ള വ്യാപാരം, നിക്ഷേപം, സാമ്പത്തിക സഹകരണം എന്നിവയുടെ പുതിയ വഴികൾ കണ്ടെത്താനും സന്ദർശനം ലക്ഷ്യമിടുന്നു. മന്ത്രിയോടൊപ്പം  ഔദ്യോഗീക സംഘവും എത്തുന്നുണ്ട്.

റിയാദിലെ  ലുലു ഹൈപ്പർ മാർക്കറ്റിലെ ദീപാവലി ഉത്സവവും കേന്ദ്രമന്ത്രി ഉദ്ഘാടനം ചെയ്യും. കൂടാതെ ഇന്ത്യൻ എംബസിയിൽ ഒരുക്കുന്ന പ്രാദേശിക ഇന്ത്യൻ ഉൽപ്പന്നങ്ങൾ പ്രോത്സാഹിപ്പിക്കാനുള്ള പ്രത്യേക വിഭാഗത്തിന്റെ  ഉദ്ഘാടനവും  മന്ത്രി നിർവഹിക്കും.