നിന്റെ കണ്ണുകളിലെ നിലാവട്ടത്തിലാണ് – ഗിരിജ ചാത്തുണ്ണി എഴുതിയ കവിത

നിന്റെ കണ്ണുകളിലെ നിലാവട്ടത്തിലാണ്

വസന്തമെന്ന ഒറ്റവരികവിതയെഴുതിയത്..

ചുവപ്പെന്നടയാളപ്പെടുത്തിയ പൂക്കളിലാണ്  പ്രണയമെന്നെഴുതിയത്..

മഴയെന്നെഴുതി ശ്രുതിമീട്ടിയ 

രാഗത്തെയാണ് ജീവിതമെന്നെഴുതിയത്..
 

രാത്രിയുടെ തുമ്പ് മടക്കിയ നിലാവാണ്

പകലിനോട് വെളിച്ചത്തെക്കുറിച്ചു പറഞ്ഞത്..

സ്നേഹത്തിന്റെ മറുവാക്കുകളിൽ 

കൊഴിഞ്ഞുവീണ ഇലകളാണ് 

ശിശിരമെന്നെഴുതിയത്...

മഴയുടെ സ്വപ്നങ്ങൾ കടം

ചോദിച്ചപ്പോഴാണ് പ്രളയമെന്നെഴുതിയത്..
 

രാവുറങ്ങിയ മൂന്നാം യാമത്തിലെ

വശ്യമായ പുഞ്ചിരിയെ 

പൗർണ്ണമിയെന്നെഴുതിയപ്പോഴാണ് 

നിന്റെ നിനവുകൾക്കപ്പുറം

ഒരുവരിയെഴുതാനാവാതെ  

ഇരുട്ടിനെ തറ്റുടുത്ത് 

കടൽ പുതച്ചുറങ്ങിയ വൃക്ഷച്ചുവട്ടിലേക്ക് 

പതിയെയിറങ്ങിയത് !!