ഉത്സവ പ്രതീതി നിറച്ച് ‘അജഗജാന്തര’ത്തിലെ പാട്ട്; വിഡിയോ

അജഗജാന്തരത്തിലെ പുതിയ വിഡിയോ ഗാനം പുറത്തിറങ്ങി. പ്രേക്ഷകർക്ക് ഉത്സവപ്രതീതി സമ്മാനിക്കുന്ന പാട്ട് മത്തായി സുനില്‍ ആണ് ആലപിച്ചിരിക്കുന്നത്. സുധീഷ് മരുതലം പാട്ടിനു വരികൾ കുറിച്ചു സംഗീതം പകർന്നിരിക്കുന്നു. ചിത്രത്തിൽ പ്രധാന വേഷങ്ങളിലെത്തുന്ന പെപ്പെ (ആന്റണി വർഗീസ്), അര്‍ജുന്‍ അശോകന്‍, സാബുമോന്‍ തുടങ്ങിയവരെ ഗാനരംഗത്തിൽ കാണാം. 

ചുരുങ്ങിയ സമയത്തിനകം ശ്രദ്ധേയമായ ഗാനം ഇതിനോടകം നിരവധി ആസ്വാദകരെയും സ്വന്തമാക്കിക്കഴിഞ്ഞു. മികച്ച പ്രതികരണങ്ങളാണു ലഭിക്കുന്നത്. ചിത്രത്തിലെ നേരത്തെ പുറത്തിറങ്ങിയ പാട്ടും ഏറെ ശ്രദ്ധിക്കപ്പെട്ടിരുന്നു. 

ടിനു പാപ്പച്ചൻ സംവിധാനം ചെയ്യുന്ന ചിത്രമാണ് ‘അജഗജാന്തരം’. ആന്റണി വർഗീസിന്റെ കരിയറിൽ ഏറ്റവും മുതൽ മുടക്കുള്ള ചിത്രമാണിത്. ചെമ്പൻ വിനോദ്, ജാഫർ ഇടുക്കി, രാജേഷ് ശർമ, സുധി കോപ്പ, വിനീത് വിശ്വം, ലുക്മാൻ, ശ്രീരഞ്ജിനി തുടങ്ങിയവരും പ്രധാന വേഷങ്ങളിലെത്തുന്നു. 

സിൽവർ ബേ പ്രൊഡക്‌ഷൻസിന്റെ ബാനറിൽ എമ്മാനുവൽ ജോസഫും അജിത് തലാപ്പിള്ളിയും ചേർന്നു നിർമ്മിക്കുന്ന ചിത്രത്തിന്റെ തിരക്കഥയൊരുക്കിയിരിക്കുന്നത് കിച്ചു ടെല്ലസ്, വിനീത് വിശ്വം എന്നിവർ ചേർന്നാണ്. ഡിസംബർ 23ന് ‘അജഗജാന്തം’ പ്രദർശനത്തിനെത്തും.