ഇഷാൻ ദേവിന്റെ ഈണത്തിൽ വീണ്ടും പുലിമടയിലെ പാട്ട്; ഹൃദയങ്ങൾ കീഴടക്കാൻ ‘നീലവാനിലേ...’

ജോജു ജോർജ് നായകനായെത്തുന്ന ‘പുലിമട’യിലെ പുതിയ ഗാനം പ്രേക്ഷകർക്കരികിൽ. ‘നീലവാനിലേ...’ എന്നു തുടങ്ങുന്ന പാട്ടിന് ഇഷാന്‍ ദേവ് ആണ് ഈണമൊരുക്കിയത്. ഡോ.താര ജയശങ്കർ വരികൾ കുറിച്ച ഗാനം പ്രദീപ് കുമാർ ആലപിച്ചു. ചുരുങ്ങിയ സമയം കൊണ്ട് ശ്രദ്ധേയമായ പാട്ടിനു മികച്ച പ്രതികരണങ്ങളാണു ലഭിക്കുന്നത്. 

മലയാളികൾക്കു നിരവധി ഹിറ്റ് സിനിമകൾ സമ്മാനിച്ച എ.കെ.സാജന്റെ സംവിധാന മികവിലൊരുങ്ങിയ ചിത്രമാണ് ‘പുലിമട’. മികച്ച പ്രേക്ഷകസ്വീകാര്യതയാണ് ചിത്രത്തിനു ലഭിച്ചത്. ഐശ്വര്യ രാജേഷും ലിജോമോളുമാണ് പുലിമടയിൽ ജോജു ജോർജിന്റെ നായികമാരായി എത്തിയത്. 

ബാലചന്ദ്രമേനോൻ, ചെമ്പൻ വിനോദ്, ജോണി ആന്റണി, ജാഫർ ഇടുക്കി, ജിയോ ബേബി, അബു സലിം, സോന നായർ, കൃഷ്ണ പ്രഭ, പൗളി വിത്സൻ, ഷിബില തുടങ്ങിയവരും പുലിമടയില്‍ ശ്രദ്ധേയമായ വേഷങ്ങൾ കൈകാര്യം ചെയ്തു. ഇങ്ക് ലാബ് സിനിമാസിന്റേയും ലാൻഡ് സിനിമാസിന്റേയും ബാനറുകളിൽ രാജേഷ് ദാമോദരൻ, സിജോ വടക്കൻ എന്നിവർ ചേർന്നാണു പുലിമട നിർമിച്ചത്.