പിന്നണിഗായികയായി അരങ്ങേറ്റം; മില്യനടിക്കാനൊരുങ്ങി അമല പോളിന്റെ പാട്ട്

നടി അമല പോൾ ആലപിച്ച ‘എന്റെ പിന്നിലെ രൂപം’ എന്നു തുടങ്ങുന്ന ഗാനം ആസ്വാദകശ്രദ്ധ നേടുന്നു. ലെവൽ ക്രോസ് എന്ന ചിത്രത്തിനു വേണ്ടിയാണ് അമല പിന്നണി പാടിയത്. വിനായക് ശശികുമാർ വരികൾ കുറിച്ച പാട്ടിന് വിശാൽ ചന്ദ്രശേഖർ ഈണമൊരുക്കി. ഇതിനകം ശ്രദ്ധേയമായ പാട്ട് മില്യനടുത്ത് പ്രേക്ഷകരെ നേടി. നിരവധി പേരാണ് അമല പോളിന്റെ ആലാപനശൈലിയെ പ്രശംസിക്കുന്നത്. 

‘എന്റെ പിന്നിലെ രൂപം ഒരു ഭീതിയായ പടരും

ഏതു കോണിലുമെന്നെ നിഴലായ് പിന്തുടരെ

കൂരിരുൾ കിനാവ് പോലെ എന്റെ കാഴ്ച മറയവെ

ചോര തൻ വിടാത്ത ഗന്ധം ഇന്നാ കാറ്റിൽ കലരവെ...’

ആസിഫ് അലി, ഷറഫുദ്ദീൻ, അമല പോൾ എന്നിവർ മുഖ്യ വേഷങ്ങളിലെത്തുന്ന ചിത്രമാണ് ‘ലെവൽ ക്രോസ്’. ജീത്തു ജോസഫിന്റെ സംവിധാന സഹായി അർഫാസ് അയൂബ് സംവിധാനം ചെയ്യുന്നു. നടന്‍ ആദം അയൂബിന്റെ മകനാണ് അർഫാസ്. അർഫാസിന്റെ ആദ്യ സിനിമയായ ‘ലെവെൽ ക്രോസി’ൽ ഞെട്ടിക്കുന്ന മേക്കോവറിലാണ് ആസിഫ് അലി എത്തുന്നത്. ചിത്രത്തിന്റെ ഫസ്റ്റ്ലുക്ക് പോസ്റ്റർ ശ്രദ്ധിക്കപ്പെട്ടിരുന്നു. രമേശ്‌ പിള്ളയാണ് ചിത്രം നിർമിക്കുന്നത്.