തരംഗമായി ‘മന്നിപ്പ്’, അരക്കോടിക്കടുത്ത് കാഴ്ചക്കാർ; ട്രെൻഡിങ്ങായി ‘കങ്കുവ’യിലെ പാട്ട്
Mail This Article
സൂര്യ നായകനായെത്തിയ ബിഗ് ബജറ്റ് ചിത്രം ‘കങ്കുവ’യിലെ പാട്ട് യൂട്യൂബിൽ തരംഗമാകുന്നു. ‘മന്നിപ്പ്’ എന്നു തുടങ്ങുന്ന പാട്ടിന് വിവേക ആണ് വരികൾ കുറിച്ചത്. ദേവി ശ്രീ പ്രസാദ് ഈണമൊരുക്കിയ ഗാനം രഘു ദീക്ഷിത് ആലപിച്ചു. ചുരുങ്ങിയ സമയം കൊണ്ടു ശ്രദ്ധേയമായ പാട്ടിന്റെ കാഴ്ചക്കാർ അരക്കോടിയോട് അടുക്കുന്നു. ട്രെൻഡിങ്ങിലും മുൻനിരയിലുണ്ട് ‘മന്നിപ്പ്’.
കങ്കുവയിൽ രണ്ടു ഗെറ്റപ്പുകളിലാണ് സൂര്യ എത്തുന്നത്. ബോബി ഡിയോൾ വില്ലൻ വേഷം കൈകാര്യം ചെയ്യുന്നു. ബോബി ഡിയോളിന്റെ കോളിവുഡ് അരങ്ങേറ്റം കൂടിയാണ് കങ്കുവ. ചിത്രം നവംബർ 14ന് തിയറ്ററുകളിലെത്തി.
1000 വർഷങ്ങൾക്കു മുമ്പുള്ള കാലഘട്ടത്തിലൂടെ സഞ്ചരിക്കുന്ന കങ്കുവയിൽ യോദ്ധാവായാണ് സൂര്യ എത്തുന്നത്. സിരുത്തൈ ശിവ ചിത്രം സംവിധാനം ചെയ്തിരിക്കുന്നു. ബോളിവുഡ് താരം ദിഷ പഠാനിയാണ് നായിക. സ്റ്റുഡിയോ ഗ്രീനും യുവി ക്രിയേഷൻസും ചേർന്നു ചിത്രം നിർമിച്ചു.
ഛായാഗ്രഹണം: വെട്രി പളനിസാമി. മലയാളത്തിലെ എഡിറ്റിങ് വിദഗ്ദനായ നിഷാദ് യൂസഫാണ് ചിത്രത്തിന്റെ എഡിറ്റിങ് നിർവഹിച്ചിരിക്കുന്നത്. ഗോകുലം മൂവിസ് ആണ് ചിത്രം കേരളത്തിൽ വിതരണത്തിനെത്തിക്കുന്നത്.
