സംവാദം: യുവമോർച്ച നേതാവിന്റെ പേര് നിർദേശിച്ച് ബിജെപി

ന്യൂഡൽഹി ∙ രാഹുൽ ഗാന്ധിയുമായുള്ള സംവാദത്തിന് യുവമോർച്ച ദേശീയ വൈസ് പ്രസിഡന്റ് അഭിനവ് പ്രകാശിനെ നിയോഗിക്കുമെന്ന് ദേശീയ പ്രസിഡന്റ് തേജസ്വി സൂര്യ പറഞ്ഞു. ഇക്കാര്യം വ്യക്തമാക്കി അദ്ദേഹം രാഹുലിന് കത്തയച്ചു. ദലിത് വിഭാഗത്തിൽ പെട്ട റായ്ബറേലി സ്വദേശിയായ അഭിനവ് പ്രകാശ് ദശകങ്ങൾ ഇന്ത്യ ഭരിച്ച രാഷ്ട്രീയ കുടുംബത്തിലെ ഇളമുറക്കാരനായ രാഹുലിനോട് സംവദിക്കാൻ അനുയോജ്യനാണെന്ന് തേജസ്വി സൂര്യ കത്തിൽ പറഞ്ഞു. 

സുപ്രീം കോടതി മുൻ ജഡ്ജി ജസ്റ്റിസ് മദൻ ബി.ലോക്കൂർ, ഡൽഹി ഹൈക്കോടതി മുൻ ചീഫ് ജസ്റ്റിസ് എ.പി. ഷാ, മാധ്യമപ്രവർത്തകൻ എൻ.റാം എന്നിവരാണ് കഴിഞ്ഞ ദിവസം മോദിയെയും രാഹുലിനെയും പൊതുസംവാദത്തിനായി ക്ഷണിച്ചത്. രാഹുൽ ക്ഷണം സ്വീകരിച്ചെങ്കിലും ബിജെപി ഇതിനോട് പ്രതികരിച്ചിരുന്നില്ല.