വയനാട് മണ്ഡലത്തിൽ നിന്നുള്ള എംഎൽഎമാർ റായ്ബറേലിയിൽ

റായ്ബറേലി ∙ രാഹുൽ ഗാന്ധിയുടെ പ്രചാരണത്തിന് അദ്ദേഹം മത്സരിച്ച വയനാട് മണ്ഡലത്തിൽ നിന്നുള്ള എംഎൽഎമാരും റായ്ബറേലിയിലെത്തി. കെപിസിസി വർക്കിങ് പ്രസിഡന്റ് കൂടിയായ ടി.സിദ്ദിഖ്, ഐ.സി.ബാലകൃഷ്ണൻ, എ.പി.അനിൽകുമാർ എന്നീ എംഎൽഎമാരാണ് 2 ദിവസമായി മണ്ഡലത്തിൽ പ്രചാരണം നടത്തുന്നത്. 

പ്രിയങ്ക ഗാന്ധിയുടെ പ്രചാരണ യോഗങ്ങൾക്കൊപ്പം കുടുംബ യോഗങ്ങളിലും കേരള എംഎൽഎമാർ പങ്കെടുത്തു. സരേണി, ലാൽഗഞ്ച്, ഗുരുബക്ഷ്ഗഞ്ച് എന്നിവിടങ്ങളിൽ യോഗങ്ങളിൽ പങ്കെടുത്ത് വോട്ടഭ്യർഥിച്ചു. 

ഇന്ത്യാസഖ്യത്തിന്റെ മുന്നേറ്റത്തിൽ റായ്ബറേലിയിലെ രാഹുലിന്റെ സ്ഥാനാർഥിത്വം വലിയ പങ്കുവഹിക്കുമെന്ന് സിദ്ദിഖ് പറഞ്ഞു. ജനങ്ങൾ കോൺഗ്രസിന്റെ തിരിച്ചുവരവിന് കാത്തിരിക്കുന്നതായാണ് അനുഭവപ്പെട്ടതെന്ന് ബാലകൃഷ്ണനും അനിൽകുമാറും പറഞ്ഞു. ഈ മാസം 14ന് ഇവിടെ എത്തിയ കേരള നേതാക്കൾ 18 വരെ പ്രചാരണത്തിനുണ്ടാവും. ഇന്ന് റായ്ബറേലിയിൽ രാഹുൽഗാന്ധി നടത്തുന്ന റാലിയിലും പങ്കെടുക്കും.