പേരക്കുട്ടികളെ നീന്തൽ പഠിപ്പിക്കുന്നതിനിടെ മുത്തച്ഛൻ മുങ്ങിമരിച്ചു

ഫറോക്ക് (കോഴിക്കോട്) ∙ പേരക്കുട്ടികളെ നീന്തൽ പഠിപ്പിക്കാനായി കുളത്തിൽ ഇറങ്ങിയ മുത്തച്ഛനു ദാരുണാന്ത്യം. ഈസ്റ്റ് നല്ലൂർ കള്ളിക്കൂടം കാട്ടുങ്ങൽ ഹൗസിൽ പീച്ചനാരി രാജനാണ് (65) കള്ളിക്കൂടം തുളിശ്ശേരി കുളത്തിൽ മുങ്ങിമരിച്ചത്.

മകൻ ഷിജുവിന്റെ മക്കളായ ആദിദേവിനും ആര്യനുമൊപ്പമാണ് രാവിലെ പതിനൊന്നോടെ കുളത്തിൽ ഇറങ്ങിയത്. ആര്യനെ നീന്തൽ പഠിപ്പിക്കുന്നതിനിടെ രാജൻ പെട്ടെന്നു മുങ്ങിത്താഴ്ന്നു. കുട്ടികൾ ബഹളം വച്ചതോടെ, കുളത്തിന്റെ മറുഭാഗത്ത് കുളിക്കുകയായിരുന്ന അയൽവാസി പത്താം ക്ലാസ് വിദ്യാർഥിയായ എം.ഇഷാഖ് നീന്തിയെത്തി ആര്യനെ കരകയറ്റി. ഓടിക്കൂടിയ നാട്ടുകാർ രാജനെ പുറത്തെടുത്തു ചുങ്കത്തെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

അമൃത് പദ്ധതിയിൽ‍ ഉൾപ്പെടുത്തി നഗരസഭ രണ്ടാഴ്ച മുൻപ് ചെളി നീക്കി ആഴം കൂട്ടിയ കുളത്തിലാണ് അപകടം. കോമൺവെൽത്ത് ഓട്ടുകമ്പനി മുൻ ജീവനക്കാരനാണ്. സംസ്കാരം ഇന്ന് ഉച്ചയ്ക്ക് 11നു വീട്ടുവളപ്പിൽ. ഭാര്യ: പ്രേമ. മറ്റു മക്കൾ: സിൽജ, സിജിന. മരുമക്കൾ: സജീഷ്(പുതുക്കഴിപ്പാടം), പ്രവീൺ (കരുവൻതിരുത്തി), ശരണ്യ. സഹോദരങ്ങൾ: കൃഷ്ണൻ, ചന്ദ്രൻ, ശാന്ത, വത്സല, ശോഭന.