‘സുഭാഷേ സബാഷ്’: ഓടയിൽവീണ് ഒഴുകിപ്പോയ 5 വയസുകാരനെ രക്ഷിച്ച സുഭാഷിന് അഭിനന്ദനവുമായി മന്ത്രി ശിവൻകുട്ടി

തൃശൂർ∙ മഴക്കെടുതിയിൽ കാലുതെറ്റി ഓടയിൽവീണ് ഒഴുകിപ്പോയ 5 വയസുകാരനെ രക്ഷിച്ച ഓട്ടോ ഡ്രൈവർ സുഭാഷിനെ അഭിനന്ദിച്ച് മന്ത്രി വി.ശിവൻകുട്ടി. ‘സുഭാഷേ സബാഷ്’ എന്ന തലക്കെട്ടിൽ ഓടയിൽനിന്ന് കുരുന്നിന്റെ ജീവൻ കോരിയെടുത്ത സുഭാഷിന് അഭിനന്ദനങ്ങൾ നേരുന്നതായി മന്ത്രി സമൂഹമാധ്യമത്തിൽ പങ്കുവെച്ച കുറിപ്പിൽ പറഞ്ഞു. 

സുഭാഷ് കുട്ടിയെ രക്ഷിച്ചതിനെക്കുറിച്ചുള്ള മനോരമ ഓൺലൈനിന്റെ വാർത്തയും മന്ത്രി പങ്കുവെച്ചു. സുഭാഷിന്റെ പ്രവൃത്തിയിൽ അഭിമാനമുണ്ടെന്നും മന്ത്രി കൂട്ടിച്ചേർത്തു. ഓടയുടെ സ്ലാബിനടിയിൽക്കൂടി 10 മീറ്ററോളം ഒഴുകിപ്പോയ കുട്ടിയെയാണ് സുഭാഷ് രക്ഷിച്ചത്. വ്യാഴാഴ്ച ഉച്ചയ്ക്ക് 2 മണിക്ക് പൊന്മാണി രാജുവിന്റെയും റോജിയുടെയും മകൻ റയാൻ (5) ആണ് കിഴക്കുപുറം റോഡിലെ ഓടയിൽ വീണത്.