നൂറിലും മാറാത്ത കൂറ്; കമലയ്ക്ക് വോട്ടിട്ട് മുൻ യുഎസ് പ്രസിഡന്റ് ജിമ്മി കാർട്ടർ – വിഡിയോ

ജോർജിയ∙ യുഎസ് പ്രസിഡന്റ് തിരഞ്ഞെടുപ്പിൽ ഡെമോക്രാറ്റിക് പാർട്ടി സ്ഥാനാർഥിയായ കമലാ ഹാരിസിന് വോട്ട് ചെയ്യാനെത്തി മുൻ യുഎസ് പ്രസിഡന്റ് ജിമ്മി കാർട്ടർ. 100 വയസ്സുള്ള ജിമ്മി കാർട്ടർ ആശുപത്രി കിടക്കയിൽ നിന്നാണ് വോട്ട് ചെയ്യാനെത്തിയത്. ജോർജിയയിലെ പ്രത്യേക വോട്ടിങ് കേന്ദ്രത്തിൽ ജിമ്മി കാർട്ടറെ വോട്ട് ചെയ്യാനായി കിടക്കയിൽ കൊണ്ടുവരുന്ന ദൃശ്യങ്ങൾ സമൂഹ മാധ്യമങ്ങളിൽ വൈറലായി.

ദിവസങ്ങൾക്ക് മുൻപ്, തന്റെ ചെറുമകൻ ജേസൺ കാർട്ടറോട് തനിക്ക് കമലാ ഹാരിസിന് വോട്ട് രേഖപ്പെടുത്താൻ ആഗ്രഹമുണ്ടെന്ന് ജിമ്മി കാർട്ടർ അറിയിച്ചിരുന്നു. ജീവിച്ചിരിക്കുന്ന മുൻ യുഎസ് പ്രസി‍ഡന്റുമാരിൽ ഏറ്റവും പ്രായം കൂടിയ വ്യക്തിയാണ്. ആരോഗ്യപ്രശ്നങ്ങളും പ്രായാധിക്യവും കാരണം 19 മാസത്തിലേറെയായി ആശുപത്രിയിൽ ചികിത്സയിലാണ് അദ്ദേഹം. 1977-81 കാലഘട്ടത്തിൽ യുഎസിന്റെ 39–ാം പ്രസിഡന്റായിരുന്നു ഡമോക്രാറ്റിക് പാർട്ടി നേതാവായ ജിമ്മി കാർട്ടർ.