ഐസ്ക്രീം വിൽപനക്കാരന്റെ ട്രിക്കിന് മുന്നിൽ രാധികയും; രസകരമായ നിമിഷങ്ങൾ ആസ്വദിച്ച് അനന്ത് അംബാനി

ടർക്കിഷ് ഐസ്ക്രീം നുണയാതെ ദുബായിൽ നിന്ന് തിരിച്ചു പോരുന്നത് നടക്കുന്ന കാര്യമല്ല. എത്ര തവണ വേണ്ടെന്ന് വച്ചാലും അത് സഞ്ചാരികളെ മാടി വിളിച്ചു കൊണ്ടേയിരിക്കും. ടർക്കിഷ് ഐസ്ക്രീം ഷോപ്പിൽ പോയി ഒരു ഐസ്ക്രീമിന് ഓർഡർ ചെയ്ത് അത് കൈയിൽ കിട്ടുന്നതു വരെയുള്ള 'കഷ്ടപ്പാടുകൾ' സോഷ്യൽ മീഡിയയിൽ വൈറലാണ്. ഇപ്പോൾ ഇതാ ടർക്കിഷ് ഐസ്ക്രീം രുചിക്കാൻ ദുബായിൽ എത്തിയ രാധിക അംബാനി ആണ് സോഷ്യൽ മീഡിയയിൽ താരം. അംബാനി അപ്ഡേറ്റ് എന്ന ഇൻസ്റ്റഗ്രാം പേജിലാണ് ദുബായിൽ ടർക്കിഷ് ഐസ്ക്രീം ആസ്വദിക്കുന്ന രാധികയുടെ വിഡിയോ പങ്കുവച്ചിരിക്കുന്നത്.

രാധിക അംബാനിക്കൊപ്പം ഭർത്താവ് അനന്ത് അംബാനിയും ഉണ്ട്. കമന്റ് ബോക്സിൽ നിന്ന് വ്യക്തമാകുന്നത് ഇരുവരും ദുബായിലെ ഗ്ലോബൽ വില്ലേജ് സന്ദർശിക്കാൻ എത്തിയതാണ് എന്നാണ്. ടർക്കിഷ് ഐസ്ക്രീം കടക്കാരനുമായുള്ള രാധികയുടെയും അനന്തിന്റെയും മനോഹരമായ  ആശയവിനിമയം സോഷ്യൽ മീഡിയയുടെ ഹൃദയം കീഴടക്കിയിരിക്കുകയാണ്. ഇൻസ്റ്റഗ്രാമിൽ പങ്കുവയ്ക്കപ്പെട്ട വിഡിയോ ഇതിനകം നിരവധി പേരാണ് കണ്ടിരിക്കുന്നത്.

വിഡിയോയിൽ ടർക്കിഷ് ഐസ്ക്രീമിനായി കാത്തു നിൽക്കുന്ന രാധികയെ കാണാൻ സാധിക്കും. രാധികയ്ക്കൊപ്പം അനന്ത് അംബാനിയുമുണ്ട്. ഐസ്ക്രീം കോൺ കൈമാറുമ്പോൾ കടക്കാരൻ തന്റെ ക്ലാസിക് ട്രിക്കുകൾ പുറത്തെടുക്കുന്നുണ്ട്. ഐസ്ക്രീം കോൺ തന്റെ നേരെ നീട്ടി ഓരോ ട്രിക്കുമായി കടക്കാരൻ എത്തുമ്പോൾ അതിനെയെല്ലാം ഒരു ചിരിയോടെ ആസ്വദിക്കുന്ന രാധികയെ വിഡിയോയിൽ കാണാം. 

ഇടയ്ക്ക് അനന്തിന്റെ സഹായം അഭ്യർത്ഥിക്കുന്നുണ്ടെങ്കിലും പ്രിയഭാര്യയെ അനന്ത് ഒരു ചെറുചിരിയോടെ പ്രോത്സാഹിപ്പിക്കുന്നത് കാണാം. രാധിക രസകരമായി ഐസ്ക്രീമിനു വേണ്ടിയുള്ള ശ്രമം നടത്തുന്നത് ഒരു ചിരിയോടെ അനന്ത് ആസ്വദിക്കുന്നതും വിഡിയോയിൽ കാണാം. കുറച്ച് നേരം രാധികയ്ക്ക് ഐസ്ക്രീം നൽകി കബളിപ്പിക്കാൻ ശ്രമിച്ചതിനു ശേഷം  കടക്കാരൻ ഐസ്ക്രീം നൽകുന്നതോടെ വിഡിയോ അവസാനിക്കുന്നു.

'ദുബായിൽ ടർക്കിഷ് ഐസ്ക്രീം ആസ്വദിക്കുന്ന അനന്തും രാധികയും' എന്ന അടിക്കുറിപ്പോടെയാണ് വിഡിയോ സോഷ്യൽ മീഡിയയിൽ പങ്കുവെച്ചിരിക്കുന്നത്. രസകരമായ കമന്റുകളാണ് വിഡിയോയ്ക്ക് ലഭിച്ചിരിക്കുന്നത്. ഇക്കഴിഞ്ഞ ജൂലൈ 12ന് ആയിരുന്നു മുംബൈയിലെ ജിയോ വേൾഡ് കൺവെൻഷൻ സെന്ററിൽ വച്ച് അനന്ത് അംബാനിയും രാധിക മെർച്ചന്റും വിവാഹിതരായത്.