ഫെഡറൽ ബാങ്കിന് വായ്പയിലും നിക്ഷേപത്തിലും മികച്ച വളർച്ച; കാസ അനുപാതവും തിരിച്ചുകയറുന്നു

ആലുവ ആസ്ഥാനമായ പ്രമുഖ സ്വകാര്യബാങ്കായ ഫെഡറൽ ബാങ്ക് നടപ്പു സാമ്പത്തിക വർഷത്തെ (2024-25) രണ്ടാംപാദമായ ജൂലൈ-സെപ്റ്റംബറിലെ പ്രാഥമിക ബിസിനസ് വളർച്ചാക്കണക്കുകൾ പുറത്തുവിട്ടു. സെപ്റ്റംബർ 30ന് സമാപിച്ച പാദത്തിൽ മൊത്തം നിക്ഷേപം (Total Deposits) മുൻവർഷത്തെ സമാനപാദത്തിലെ 2.32 ലക്ഷം കോടി രൂപയിൽ നിന്ന് 15.6% ഉയർന്ന് 2.69 ലക്ഷം കോടി രൂപയിലെത്തിയെന്ന് സ്റ്റോക്ക് എക്സ്ചേഞ്ചുകൾക്ക് സമർപ്പിച്ച റിപ്പോർട്ടിൽ ഫെഡറൽ ബാങ്ക് വ്യക്തമാക്കി.

മൊത്തം വായ്പകൾ (Gross Advances) 2.33 ലക്ഷം കോടി രൂപയായും ഉയർന്നു; 19.3 ശതമാനമാണ് വളർച്ച. 2023-24ലെ സമാനപാദത്തിൽ ഇത് 1.95 ലക്ഷം കോടി രൂപയായിരുന്നു. റീറ്റെയ്ൽ വായ്പകളിൽ (retail loans) 23 ശതമാനവും ഹോൾസെയിൽ വായ്പകളിൽ (wholesale credit book) 13 ശതമാനവുമാണ് വർധന. റീറ്റെയ്ൽ-ഹോൾസെയിൽ വായ്പാ അനുപാതം 57:43 ആണെന്നും റിപ്പോർട്ടിലുണ്ട്. 

കറന്റ് അക്കൗണ്ട് സേവിങ്സ് അക്കൗണ്ട് (കാസ/CASA) നിക്ഷേപം 72,589 കോടി രൂപയിൽ നിന്ന് 11.5% മെച്ചപ്പെട്ട് 80,923 കോടി രൂപയായി. അതേസമയം, കാസ അനുപാതം 31.17 ശതമാനത്തിൽ നിന്ന് 30.07 ശതമാനമായി കുറഞ്ഞത് പോരായ്മയാണ്. എന്നാൽ, ഇക്കഴിഞ്ഞ ഏപ്രിൽ-ജൂൺപാദത്തിലെ 29.27 ശതമാനത്തിൽ നിന്ന് കാസ അനുപാതം തിരിച്ചുകയറുന്നു എന്ന നേട്ടവുമുണ്ട്. ഇക്കഴി‍ഞ്ഞ ജൂൺപാദത്തിൽ ഫെഡറൽ ബാങ്ക് 18.2% വളർച്ചയോടെ 1,010 കോടി രൂപയുടെ ലാഭം നേടിയിരുന്നു.

കേരളം ആസ്ഥാനമായ സൗത്ത് ഇന്ത്യൻ ബാങ്ക്, സിഎസ്ബി ബാങ്ക് എന്നിവയും സെപ്റ്റംബർപാദ ബിസിനസ് കണക്കുകൾ പുറത്തുവിട്ടിരുന്നു. വിശദാംശങ്ങൾ താഴെ ക്ലിക്ക് ചെയ്തു വായിക്കാം:

സൗത്ത് ഇന്ത്യൻ ബാങ്ക്
സിഎസ്ബി ബാങ്ക്

ഫെഡറൽ ബാങ്ക് ഓഹരികളുടെ പ്രകടനം
 

ഇന്നലെ 0.09% നേട്ടവുമായി 193.97 രൂപയാണ് ഫെഡറൽ ബാങ്ക് ഓഹരികൾ വ്യാപാരം അവസാനിപ്പിച്ചത്. 47,584 കോടി രൂപ വിപണിമൂല്യമുള്ള ബാങ്കിന്റെ ഓഹരികൾ കഴിഞ്ഞ ഒരുമാസത്തിനിടെ 3 ശതമാനവും 6 മാസത്തിനിടെ 27 ശതമാനവും ഒരുവർഷത്തിനിടെ 31 ശതമാനവും നേട്ടമാണ് (റിട്ടേൺ) നിക്ഷേപകർക്ക് സമ്മാനിച്ചത്. 128 ശതമാനമാണ് കഴിഞ്ഞ 5 വർഷത്തെ വളർച്ച. ഫെഡറൽ ബാങ്കിന്റെ മാനേജിങ് ഡയറക്ടറും സിഇഒയുമായി കെ.വി.എസ്. മണിയൻ കഴിഞ്ഞമാസം സ്ഥാനമേറ്റിരുന്നു (Read Details).

(Disclaimer: ഈ ലേഖനം ഓഹരി വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല. ഓഹരി നിക്ഷേപം വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്‍റെ ഉപദേശം തേടുകയോ ചെയ്യുക)