ആദ്യം ബാറ്റുചെയ്ത് 20 ഓവറിൽ 1ന് 283 റൺസ്, ദക്ഷിണാഫ്രിക്കയെ 148ന് പുറത്താക്കി; ഇന്ത്യയ്ക്ക് സമഗ്രാധിപത്യവുമായി ‘വണ്ടർ’ ജയം, പരമ്പര

ജൊഹാനസ്ബർഗ് ∙ വാണ്ടറേഴ്സ് സ്റ്റേഡിയത്തിൽ ആദ്യം ബാറ്റുകൊണ്ടും പിന്നാലെ പന്തുകൊണ്ടും ‘വണ്ടർ’ പ്രകടനവുമായി ഇന്ത്യൻ താരങ്ങൾ കരുത്തുകാട്ടിയതോടെ, ദക്ഷിണാഫ്രിക്കയ്‌ക്കെതിരായ നാലാം ട്വന്റി20യിൽ ഇന്ത്യയ്ക്ക് കൂറ്റൻ വിജയം. ഇന്ത്യൻ ബാറ്റിങ് കരുത്തിന്റെ പ്രദർശനമായി മാറിയ മത്സരത്തിൽ 135 റൺസിനാണ് സൂര്യകുമാറിന്റെയും സംഘത്തിന്റെയും വിജയം. മത്സരത്തിൽ ടോസ് നേടി ബാറ്റിങ് തിരഞ്ഞെടുത്ത ഇന്ത്യ നിശ്ചിത 20 ഓവറിൽ ഒരു വിക്കറ്റ് നഷ്ടത്തിൽ നേടിയത് 283 റൺസ്. ദക്ഷിണാഫ്രിക്കയുടെ മറുപടി 18.2 ഓവറിൽ 148 റൺസിൽ അവസാനിച്ചു. ഇതോടെ, നാലു മത്സരങ്ങടങ്ങിയ പരമ്പര ഇന്ത്യ 3–1ന് സ്വന്തമാക്കി. കെബർഹയിൽ നടന്ന രണ്ടാം ട്വന്റി20യിൽ മാത്രമാണ് ഇന്ത്യ തോൽവി വഴങ്ങിയത്. തുടർച്ചയായ രണ്ടാം സെഞ്ചറി കുറിച്ച തിലക് വർമയാണ് കളിയിലെ കേമനും പരമ്പരയുടെ താരവും.

മത്സരത്തിൽ സെഞ്ചറി നേടിയ സഞ്ജു സാംസൺ, ഒരു കലണ്ടർ വർഷം രാജ്യാന്തര ട്വന്റി20യിൽ മൂന്ന് സെഞ്ചറി നേടുന്ന ആദ്യ താരമായി. രാജ്യാന്തര ട്വന്റി20യിൽ റൺ അടിസ്ഥാനത്തിൽ ദക്ഷിണാഫ്രിക്കയുടെ ഏറ്റവും കനത്ത തോൽവിയാണിത്. 2023ൽ ഡർബനിൽ ഓസീസിനോട് 111 റൺസിനു തോറ്റതായിരുന്നു ഇതുവരെയുള്ള ‘കനമുള്ള’ തോൽവി. ട്വന്റി20യിൽ റൺ അടിസ്ഥാനത്തിൽ ഇന്ത്യയുടെ ഉയർന്ന മൂന്നാമത്തെ വിജയം കൂടിയാണിത്. 2023ൽ ന്യൂസീലൻഡിനെതിരെ അഹമ്മദാബാദിൽ 168 റൺസിനും, 2018ൽ അയർലൻഡിനെ ഡബ്ലിനിൽ 143 റൺസിനും തോൽപ്പിച്ചതാണ് ഇതിലും വലിയ വിജയങ്ങൾ. ദക്ഷിണാഫ്രിക്കയ്‌ക്കെതിരെ 18–ാം ട്വന്റി20 മത്സരം ജയിച്ച ഇന്ത്യ, ഓസീസിന്റെ 17 വിജയങ്ങളെന്ന റെക്കോർഡ് മറികടന്നു.

29 പന്തിൽ മൂന്നു ഫോറും രണ്ടു സിക്സും സഹിതം 43 റൺസെടുത്ത ട്രിസ്റ്റൻ സ്റ്റബ്സാണ് ദക്ഷിണാഫ്രിക്കയുടെ ടോപ് സ്കോറർ. ഡേവിഡ് മില്ലർ 27 പന്തിൽ രണ്ടു ഫോറും മൂന്നു സിക്സും സഹിതം 36 റൺസെടുത്തു. അഞ്ചാം വിക്കറ്റിൽ 54 പന്തിൽ 86 റൺസ് കൂട്ടിച്ചേർത്ത ഈ സഖ്യമാണ് ദക്ഷിണാഫ്രിക്കയെ വൻ നാണക്കേടിൽനിന്ന് രക്ഷിച്ചത്. മാർക്കോ യാൻസൻ 12 പന്തിൽ രണ്ടു ഫോറും മൂന്നു സിക്സും സഹിതം 29 റൺസുമായി പുറത്താകാതെ നിന്നു.

ഇന്ത്യ ഉയർത്തിയ 284 റൺസിന്റെ കൂറ്റൻ വിജയലക്ഷ്യത്തിലേക്കു ബാറ്റെടുത്ത ദക്ഷിണാഫ്രിക്കയുടെ തുടക്കം കൂട്ടത്തകർച്ചയോടെയായിരുന്നു. സ്കോർ ബോർഡിൽ 10 റൺസ് എത്തുമ്പോഴേയ്ക്കും ഡഗ്ഔട്ടിൽ തിരിച്ചെത്തിയത് നാലു മുൻനിര‍ ബാറ്റർമാർ! ഓപ്പണർ റീസ ഹെൻഡ്രിക്സ് (രണ്ടു പന്തിൽ 0), റയാൻ റിക്കിൾടൻ (ആറു പന്തിൽ ഒന്ന്), ക്യാപ്റ്റൻ എയ്ഡൻ മർക്രം (എട്ടു പന്തിൽ ഒരു ഫോർ സഹിതം എട്ട്), ഹെൻറിച് ക്ലാസൻ (0) എന്നിവരാണ് ആദ്യ മൂന്ന് ഓവറിലായി പവലിയനിൽ തിരിച്ചെത്തിയത്. ഇവരിൽ മൂന്നു പേരെയും പുറത്താക്കി അർഷ്ദീപ് സിങ്ങാണ് ഇന്ത്യയ്‌ക്ക് മിന്നുന്ന തുടക്കം സമ്മാനിച്ചത്.

പിന്നീട് നാലാം വിക്കറ്റിൽ ഡേവിഡ് മില്ലറിനെ കൂട്ടുപിടിച്ച് ട്രിസ്റ്റൻ സ്റ്റബ്സ് നടത്തിയ രക്ഷാപ്രവർത്തനാണ് ദക്ഷിണാഫ്രിക്കയെ വലിയ നാണക്കേടിൽനിന്ന് രക്ഷിച്ചത്. നിലയുറപ്പിച്ച ശേഷം തകർത്തടിച്ച ഇരുവരും അർധസെഞ്ചറി കൂട്ടുകെട്ടും പടുത്തുയർത്തി. നാലാം വിക്കറ്റിൽ 54 പന്തിൽ 86 റൺസാണ് ഇരുവരും സ്കോർ ബോർഡിലെത്തിച്ചത്. ഇതിനു പിന്നാലെ, തുടർച്ചയായ പന്തുകളിൽ ഇരുവരും പുറത്തായതോടെ ദക്ഷിണാഫ്രിക്ക പതറി. 27 പന്തിൽ രണ്ടു ഫോറും മൂന്നു സിക്സും സഹിതം 36 റൺസെടുത്ത ഡേവിഡ് മില്ലറിനെ 12–ാം ഓവറിന്റെ അവസാന പന്തിൽ തിലക് വർമയുടെ കൈകളിലെത്തിച്ച് വരുൺ ചക്രവർത്തിയാണ് കൂട്ടുകെട്ട് പൊളിച്ചത്. തൊട്ടടുത്ത ഓവറിന്റെ ആദ്യ പന്തിൽ ട്രിസ്റ്റൻ സ്റ്റബ്സിനെ രവി ബിഷ്ണോയ് എൽബിയിൽ കുരുക്കി. 29 പന്തിൽ മൂന്നു ഫോറും രണ്ടു സിക്സും സഹിതം 43 റൺസായിരുന്നു സ്റ്റബ്സിന്റെ സംഭാവന.

തുടർന്നെത്തിയ ആൻഡിൽ സിമിലാനെ അഞ്ച്  പന്തിൽ 2 റൺസുമായി കാര്യമായ വെല്ലുവിളിക്കു നിൽക്കാതെ മടങ്ങിയപ്പോൾ എട്ടാം വിക്കറ്റിൽ 13  പന്തിൽ 26 റൺസ് കൂട്ടിച്ചേർത്ത് മാർക്കോ യാൻസൻ – ജെറാൾഡ് കോട്സെ സഖ്യം ദക്ഷിണാഫ്രിക്കയെ 130 കടത്തി. എട്ടു പന്തിൽ ഓരോ സിക്സും ഫോറും സഹിതം 12 റൺസെടുത്ത കോട്സെയെ തന്റെ ആദ്യ ഓവറിൽ അക്ഷർ പട്ടേലാണ് പുറത്താക്കിയത്. തന്റെ അടുത്ത വരവിൽ കേശവ് മഹാരാജിനെയും അക്ഷർ തന്നെ പുറത്താക്കി. എട്ടു പന്തിൽ ആറു റൺസുമായി മഹാരാജ് മടങ്ങി. നാലു പന്തിൽ മൂന്നു റൺസെടുത്ത ലുഥോ സിംപാലയെ രമൺദീപ് സിങ് പുറത്താക്കിയതോടെ ഇന്ത്യയ്ക്ക് 135 റൺസ് ജയം.

ഇന്ത്യയ്ക്കായി അർഷ്ദീപ് സിങ് മൂന്ന് ഓവറിൽ 20 റൺസ് വഴങ്ങി മൂന്നു വിക്കറ്റ് വീഴ്ത്തി. അക്ഷർ പട്ടേൽ രണ്ട് ഓവറിൽ ആറു റണ‍്സ് മാത്രം വഴങ്ങി രണ്ടു വിക്കറ്റെടുത്തു. വരുൺ ചക്രവർത്തി രണ്ടു വിക്കറ്റ് വീഴ്ത്തിയെങ്കിലും നാല് ഓവറിൽ 42 റൺസ് വഴങ്ങി. ഹാർദിക് പാണ്ഡ്യ മൂന്ന് ഓവറിൽ ഒരു മെയ്ഡൻ സഹിതം എട്ട് റൺസ് വഴങ്ങിയും രവി ബിഷ്ണോയ് മൂന്ന് ഓവറിൽ 28 റൺസ് വഴങ്ങിയും രമൺദീപ് സിങ് 3.2 ഓവറിൽ 42 റൺസ് വഴങ്ങിയും ഓരോ വിക്കറ്റ് സ്വന്തമാക്കി.

∙ ബാറ്റിങ് വിരുന്നുമായി സഞ്ജു, തിലക്!

നേരത്തേ, എന്തുകൊണ്ട് ട്വന്റി20 ഫോർമാറ്റിൽ ലോക ചാംപ്യൻമാരായി എന്നതിന്റെ സ്ഫോടനാത്മക തെളിവുമായി യുവ താരങ്ങൾ കത്തിക്കയറിയതോടെ, ട്വന്റി20 ഫോർമാറ്റിലെ ഉയർന്ന സ്കോറുകളിലൊന്ന് കുറിച്ച് ഇന്ത്യ; അതും കരുത്തരായ ദക്ഷിണാഫ്രിക്കയ്‌ക്കെതിരെ അവരുടെ തട്ടകത്തിൽ. പരമ്പരയിലാദ്യമായി ടോസ് ഭാഗ്യം അനുഗ്രഹിച്ചതോടെ ബാറ്റിങ് തിരഞ്ഞെടുത്ത ഇന്ത്യ, നിശ്ചിത 20 ഓവറിൽ ഒരു വിക്കറ്റ് നഷ്ടത്തിലാണ് 283 റൺസെടുത്തത്.

തുടർ ഡക്കുകൾക്കു ശേഷം സെഞ്ചറിത്തിളക്കത്തിലേക്കു തിരിച്ചെത്തിയ മലയാളി താരം സഞ്ജു സാംസൺ, തുടർച്ചയായ രണ്ടാം സെഞ്ചറിയുമായി തിലക് വർമയും ചേർന്നതോടെയാണ് ഇന്ത്യ കൂറ്റൻ സ്കോർ കുറിച്ചത്. രണ്ട് ഫുൾ മെമ്പർ അംഗങ്ങൾക്കിടയിലെ മത്സരത്തിൽ ഒരു ഇന്നിങ്സിൽ രണ്ട് സെഞ്ചറി പിറക്കുന്നത് ചരിത്രത്തിലെ ആദ്യ സംഭവമാണ്. 14.1 ഓവറിൽ 200 കടന്ന ഇന്ത്യ, അക്കാര്യത്തിൽ സ്വന്തം റെക്കോർഡ് തിരുത്തി. സഞ്ജു 50 പന്തിൽ ആറു ഫോറും എട്ടു സിക്സും സഹിതമാണ് പരമ്പരയിലെ രണ്ടാം സെഞ്ചറി കുറിച്ചത്. ഇന്നിങ്സിലാകെ 56 പന്തു നേരിട്ട സഞ‌്ജു, ആറു ഫോറും ഒൻപതു സിക്സും സഹിതം 109 റൺസുമായി പുറത്താകാതെ നിന്നു.

തിലക് വർമ 41 പന്തിൽ ആറു ഫോറും ഒൻപതു സിക്സും സഹിതം സെഞ്ചറി പൂർത്തിയാക്കി. ഇന്നിങ്സിലാകെ 47 പന്തുകൾ നേരിട്ട തിലക് വർമ, ഒൻപതു ഫോറും 10 സിക്സും സഹിതം 120 റൺസോടെയും പുറത്താകാതെ നിന്നു. പിരിയാത്ത രണ്ടാം വിക്കറ്റിൽ സഞ്ജു – തിലക് സഖ്യം 86 പന്തിൽ അടിച്ചുകൂട്ടിയത് 210 റൺസ്. രാജ്യാന്തര ട്വന്റി20യിൽ ഏതൊരു വിക്കറ്റിലുമായി ഉയർന്ന കൂട്ടുകെട്ടാണിത്.

ഇന്ത്യൻ താരങ്ങളുടെ സ്ഫോടനാത്മക ബാറ്റിങ്ങിനൊപ്പം, പതിവില്ലാതെ ഫീൽഡിൽ ഓട്ടക്കൈകളുമായി നിലയുറപ്പിച്ച ദക്ഷിണാഫ്രിക്കൻ ഫീൽഡർമാരുടെ ‘സഹായ’വും ഇന്ത്യയ്ക്ക് തുണയായി. തിലക് വർമയെ മാത്രം രണ്ടു തവണയാണ് ദക്ഷിണാഫ്രിക്കൻ ഫീൽഡർമാർ കൈവിട്ടത്. സഞ്ജു, അഭിഷേക് ശർമ എന്നിവരെ ഓരോ തവണയും ദക്ഷിണാഫ്രിക്കൻ താരങ്ങൾ വിട്ടുകളഞ്ഞു.

ആദ്യ ഓവറിൽത്തന്നെ ദക്ഷിണാഫ്രിക്കൻ ഫീൽഡർമാർ വിട്ടുകളഞ്ഞ ഓപ്പണർ അഭിഷേക് ശർമ 18 പന്തിൽ 36 റൺസെടുത്ത് പുറത്തായി. രണ്ടു ഫോറും നാലു സിക്സും ഉൾപ്പെടുന്നതാണ് അഭിഷേകിന്റെ ഇന്നിങ്സ്. ഓപ്പണിങ് വിക്കറ്റിൽ സഞ്ജു – അഭിഷേക് സഖ്യം 35 പന്തിൽ 73 റൺസ് അടിച്ചുകൂട്ടി തകർപ്പൻ തുടക്കം നൽകിയതിനു പിന്നാലെയായിരുന്നു ഇന്ത്യയുടെ കുതിപ്പ്.

ഇന്ത്യയ്ക്ക് നഷ്ടമായ ഒരേയൊരു വിക്കറ്റ് ലുഥോ സിംപാല സ്വന്തമാക്കി. അതേസമയം, ദക്ഷിണാഫ്രിക്കൻ നിരയിൽ ഏറ്റവും കൂടുതൽ റൺസ് വഴങ്ങിയതും സിംപാലയാണെന്ന വൈരുധ്യവുമുണ്ട്; നാല് ഓവറിൽ 58 റൺസ്! ദക്ഷിണാഫ്രിക്കൻ നിരയിൽ ഓവറിൽ ശരാശരി 14നു താഴെ റൺസ് വഴങ്ങിയ ഒരേയൊരു ബോളർ മാർക്കോ യാൻസനാണ്. നാല് ഓവറിൽ 42 റൺസ്. ഓവറിൽ ശരാശരി 10.50 റൺസ്. ബാക്കിയെല്ലാവരും ഓവറിൽ 14 റൺസിനു മുകളിൽ വഴങ്ങി. ഒരേയൊരു ഓവർ ബോൾ ചെയ്ത് 21 റൺസ് വഴങ്ങിയ ട്രിസ്റ്റൻ സ്റ്റബ്സാണ് ഓവറിൽ‌ ശരാശരി കൂടുതൽ റൺസ് വഴങ്ങിയ താരം.

∙ കടപുഴകിയ റെക്കോർഡുകൾ

∙ ഇന്ത്യൻ ഇന്നിങ്സിലാകെ പിറന്നത് 23 സിക്സറുകളാണ്. രണ്ട് ഫുൾ മെമ്പർ ടീമുകൾ തമ്മിലുള്ള മത്സരത്തിൽ ഇത് റെക്കോർഡാണ്. പിന്നിലാക്കിയത് ഈ വർഷം ഹൈദരാബാദിൽ ബംഗ്ലദേശിനെതിരെ ഇന്ത്യ അടിച്ചുകൂട്ടിയ 22 സിക്സറുകളുടെയും 2023ൽ സെഞ്ചൂറിയനിൽ ദക്ഷിണാഫ്രിക്കയ്ക്കെതിരെ വെസ്റ്റിൻഡീസ് അടിച്ചുകൂട്ടിയ 22 സിക്സറുകളുടെയും റെക്കോർഡ്.

∙ രണ്ട് ഫുൾ മെമ്പർ ടീമുകൾ തമ്മിലുള്ള മത്സരത്തിലെ ഉയർന്ന സ്കോറുകൾ

297/6 – ഇന്ത്യ ബംഗ്ലദേശിനെതിരെ ഹൈദരാബാദിൽ, 2024
283/1 – ഇന്ത്യ ദക്ഷിണാഫ്രിക്കയ്‌ക്കെതിരെ ജൊഹാനസ്ബർഗിൽ, 2024 *
278/3 – അഫ്ഗാനിസ്ഥാൻ അയർലൻഡിനെതിരെ ഡെറാഡൂണിൽ, 2019
267/3 – ഇംഗ്ലണ്ട് വെസ്റ്റിൻഡീസിനെതിരെ ടറൂബയിൽ, 2023