ഡിബ്രൂയ്നെ മികച്ച താരം; ക്ലോപ്പ് പരിശീലകൻ

ലണ്ടൻ ∙ മാഞ്ചസ്റ്റർ സിറ്റി താരം കെവിൻ ഡിബ്രൂയ്നെ ഇംഗ്ലിഷ് പ്രീമിയർ ലീഗ് ഫുട്ബോൾ സീസണിലെ മികച്ച താരം. 13 ഗോളുകളും 20 അസിസ്റ്റുമായി സിറ്റിയെ രണ്ടാം സ്ഥാനത്തെത്തിച്ച മികവാണ് ഡിബ്രൂയ്നെയെ പുരസ്കാരത്തിനുള്ള വോട്ടെടുപ്പിൽ ഒന്നാമതെത്തിച്ചത്. കഴിഞ്ഞ 9 സീസണിൽ പുരസ്കാരം നേടുന്ന മൂന്നാമത്തെ ബൽജിയം താരമാണ് ഡിബ്രൂയ്നെ. വിൻസന്റ് കോംപനി, ഏദൻ ഹസാഡ് എന്നിവരാണ് മറ്റുള്ളവർ. പ്രീമിയർ ലീഗ് ചാംപ്യൻമാരായ ലിവർപൂളിന്റെ കോച്ച് യൂർഗൻ ക്ലോപ്പ് മികച്ച പരിശീലകനായും തിരഞ്ഞെടുക്കപ്പെട്ടു.  ലിവർപൂൾ ഡിഫൻഡർ ട്രെന്റ് അലക്സാണ്ടർ ആർനോൾഡ് മികച്ച യുവതാരം.