ഹരിദ്വാറിൽനിന്ന് ഗംഗാജലവുമായി മുൻ ഹോക്കി, കബഡി താരങ്ങൾ; വിനേഷിനെ കണ്ട് വികാരാധീനരായി- വിഡിയോ

ന്യൂഡൽഹി∙ ഭാരപരിശോധനയിൽ പരാജയപ്പെട്ടതിനെ തുടർന്ന് ഒളിംപിക്സിൽനിന്ന് അയോഗ്യയാക്കപ്പെട്ട ഇന്ത്യൻ ഗുസ്തി താരം വിനേഷ് ഫോഗട്ടിനായി ഗംഗാജലവുമായി മുൻ കബഡി, ഹോക്കി താരങ്ങൾ ഞായറാഴ്ച ഹരിയാനയിലെ വീട്ടിലെത്തി. ഇവർ താരത്തിന് ഗംഗാജലം കൈമാറുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായി.

വിനേഷിനെ അയോഗ്യയായി പ്രഖ്യാപിച്ചതിനു പിന്നാലെയാണ്, റോഹ്തകിൽ നിന്നുള്ള മുൻ കബഡി താരം സന്ദീപ് ദാംഗിയും മുൻ ഹോക്കി താരമായ സുഹൃത്തും ഉൾപ്പെടെയുള്ളവർ കാൽനടയായി ഹരിദ്വാറിലേക്ക് തീർഥയാത്ര പോയി വിനേഷിനായി ഗംഗാജലവുമായി തിരിച്ചെത്തിയത്.

സംയുക്ത വെള്ളിമെഡലിനായുള്ള അപ്പീൽ രാജ്യാന്തര കായിക തർക്കപരിഹാര കോടതി തള്ളിയതിനു പിന്നാലെ ശനിയാഴ്ച ഇന്ത്യയിൽ മടങ്ങിയെത്തിയ വിനേഷിന് അധികൃതരും ആരാധകരും ചേർന്ന് രാജകീയ സ്വീകരണമാണ് നൽകിയത്. റോഡുമാർഗം വീട്ടിലേക്കുള്ള യാത്രയിൽ പലയിടങ്ങളിലും ജനം താരത്തിന് സ്വീകരണം നൽകിയിരുന്നു. സ്വന്തം ഗ്രാമത്തിൽ സ്വർണമെഡൽ നൽകിയാണ് വിനേഷിനെ സ്വീകരിച്ചത്. ഇതിനെല്ലാം പിന്നാലെയാണ് മുൻ കബഡി, ഹോക്കി താരങ്ങൾ ഗംഗാജലവുമായി വിനേഷ് ഫോഗട്ടിന്റെ വീട്ടിലെത്തിയത്.

വിനേഷിനെ കണ്ടയുടൻ സന്ദീപ് ദാംഗി വികാരാധീനനായി. ഗംഗാജലം ഉപയോഗിച്ച് വിനേഷിന്റെ കാൽകഴുകാൻ ഇരുവരും ശ്രമിച്ചെങ്കിലും ഗംഗാജലം പുണ്യതീർഥമാണെന്ന് വ്യക്തമാക്കി വിനേഷിന്റെ ഭർത്താവ് സോംവീർ റാഠി അതു വിലക്കി. തുടർന്ന് വിനേഷ് ഗംഗാജലം സ്വീകരിച്ചു.