ഹനൂമദ്‌ ജയന്തി; ഈ ചിട്ടകൾ പാലിക്കൂ , ഫലം വായൂവേഗത്തിൽ

ഹനൂമാൻ സ്വാമിയുടെ ജന്മദിനം ഹനൂമദ്‌‌ ജയന്തിയായി ആചരിക്കുന്നു. ചൈത്രമാസത്തിലെ പൗർണമി ദിനമാണ് ഹനൂമദ്‌‌ ജയന്തി വരുന്നത്.  ഈ വർഷം ചൈത്രമാസത്തിലെ പൗർണമി ഏപ്രിൽ 05 ബുധനാഴ്ച രാവിലെ 8 നു ആരംഭിച്ചു ഏപ്രിൽ 06 വ്യാഴാഴ്ച രാവിലെ 10 മണിയോടുകൂടി അവസാനിക്കുന്നു. ഉദയാൽ പരം 6 നാഴിക പൗർണമി വരുന്ന ദിനമാണ് ഹനൂമദ്‌‌ ജയന്തിയായി കണക്കാക്കപ്പെടുന്നത്. ഇതനുസരിച്ചു ഏപ്രിൽ 06 വ്യാഴാഴ്ചയാണ് ഹനൂമദ്‌‌ ജയന്തി ആചരിക്കേണ്ടത്. അന്നേദിവസം ഹനൂമാൻ സ്വാമിക്ക് സമർപ്പിക്കുന്ന വഴിപാടുകൾക്കും പ്രാർഥനകൾക്കും സവിശേഷ ഫലസിദ്ധിയുണ്ടെന്നാണ് വിശ്വാസം. ഹനൂമദ്‌പ്രീതിക്കായി ശ്രീരാമചന്ദ്രനെ ഈ ദിവസം ഭജിക്കുന്നത്‌ അത്യുത്തമം. ആഗ്രഹ സാഫല്യത്തിനായി  'ശ്രീരാമജയം' കഴിയാവുന്നത്ര തവണ ജപിക്കുകയോ എഴുതുകയോ ചെയ്യാം.    

Read also : ഈ കൂറുകാർക്ക് മഹാഭാഗ്യം; സമ്പൂർണ വിഷുഫലം 2023 ഒറ്റനോട്ടത്തിൽ

ശനിദശ, ശനിയുടെ അപഹാരം, കണ്ടകശ്ശനി, അഷ്ടമശ്ശനി, ഏഴരശ്ശനി തുടങ്ങിയ ദോഷ കാലങ്ങള്‍ അനുഭവിച്ചു വരുന്നവരും തൊഴില്‍ക്ലേശങ്ങള്‍ അനുഭവിക്കുന്നവരും ദോഷ  ശാന്തിക്കായി ഹനൂമദ്‌ ജയന്തി ദിനത്തിൽ വ്രതം അനുഷ്ഠിക്കാവുന്നതാണ്. ഹനൂമദ്‌‌ഭക്തരെ ശനിദോഷം ബാധിക്കില്ലെന്നു ശനിദേവൻ ഉറപ്പു നൽകിയിട്ടുണ്ടെന്നാണു പുരാണത്തിൽ പറയുന്നത്.

പൂര്‍ണ ഉപവാസമോ ഒരിക്കലായോ (ഒരുനേരം മാത്രം അരിയാഹാരം) വ്രതം അനുഷ്ഠിക്കാം. ഹനൂമദ്‌ക്ഷേത്ര ദര്‍ശനം നടത്തി പ്രാര്‍ഥിക്കുകയും വഴിപാടുകൾ സമർപ്പിക്കുകയും ചെയ്‌താല്‍ വായൂവേഗത്തിൽ ഫലം ലഭിക്കുമെന്ന് പറയപ്പെടുന്നു. വ്രതദിനത്തിലും തലേന്നും ശരീരശുദ്ധി നിര്‍ബന്ധമാണ്‌. എണ്ണ തേച്ചുകുളി,  പകലുറക്കം എന്നിവ  പാടില്ല. 

ഹനൂമാൻ സ്വാമിക്ക് ഏറ്റവും പ്രധാനപ്പെട്ട വഴിപാടാണ് വെറ്റിലമാല. വെറ്റിലമാല സമർപ്പിച്ചു പ്രാർഥിച്ചാൽ സർവകാര്യവിജയവും സമൃദ്ധിയുമാണ് ഫലം. നെയ്‌വിളക്ക്, സിന്ദൂരം എന്നിവ സമർപ്പിക്കുന്നതും ഉത്തമമാണ്. രോഗദുരിതങ്ങൾ തീരാൻ തുളസിമാലസമർപ്പണം ഉത്തമമത്രേ. കദളിപ്പഴം നിവേദ്യമായി സമർപ്പിക്കുന്നതും നന്ന്. 

ഈ  ദിനത്തിൽ ഹനൂമാൻ ചാലിസ പാരായണം ചെയ്യുന്നതും ശ്രവിക്കുന്നതും  സവിശേഷമാണ്. ഭയപ്പെടുത്തുന്ന ചിന്തകൾ അകറ്റാനും ദുഃസ്വപ്നം കാണാതിരിക്കാനും ചാലിസ ജപം നന്ന്. ഹനൂമാൻ ചാലിസയുടെ പ്രാരംഭ ശ്ലോകങ്ങൾ ജപിക്കുന്നതിലൂടെ ഈ ജന്മത്തിലും കഴിഞ്ഞ ജന്മത്തിലും ചെയ്ത പാപങ്ങളിൽനിന്നു മോചനം ലഭിക്കുമെന്നാണ് വിശ്വാസം. ഉത്തമഭക്തിയോടെ ജപിക്കുന്ന ഭക്തനെ യാതൊരുവിധ ക്ലേശങ്ങളിലും അകപ്പെടാതെ ഹനൂമാൻ സ്വാമി രക്ഷിക്കും എന്നാണ് പറയപ്പെടുന്നത്. ആഗ്രഹപൂർത്തീകരണത്തിനും ഏറ്റവും ഉത്തമ മാർഗമാണിത്.

ഹനൂമൽ സ്തുതി

മനോജവം മാരുത തുല്യവേഗം

ജിതേന്ദ്രിയം ബുദ്ധിമതാം വരിഷ്ഠം

വാതാത്മജം വാനരയൂഥ മുഖ്യം

ശ്രീരാമ ദൂതം ശിരസാ നമാമി 

ബുദ്ധിർ ബലം യശോധൈര്യം

നിർഭയത്വമരോഗത

അജയ്യം വാക് പടുത്വം ച

ഹനൂമത് സ്മരണാത് ഭവേത്

(ശിരസാ നമാമി എന്നതിനു പകരം ശരണം പ്രപദ്യേ എന്നൊരു പാഠഭേദം കൂടിയുണ്ട്)

Content Summary : Importance of Hanuman Jayanthi Day 2023