കട്ട ചങ്കുകൾ, ഈ രാശിക്കാരായ സുഹൃത്തുക്കളാണോ നിങ്ങൾക്കുള്ളത്? കണ്ണടച്ച് വിശ്വസിക്കാം
![Friendships Based on Zodiac Signs Image Credit: Todor Tsvetkov/ Istock](https://img-mm.manoramaonline.com/content/dam/mm/mo/astrology/astro-news/images/2024/6/8/friendships-based-on-zodiac-signs.jpg?w=1120&h=583)
Mail This Article
രക്തബന്ധത്തിനൊപ്പമോ ചിലപ്പോഴെങ്കിലും അതിനുമപ്പുറമോ ശക്തമായ ബന്ധമാണ് സുഹൃദ്ബന്ധം. ഏതൊരു സുഹൃദ് ബന്ധത്തിന്റെയും അടിസ്ഥാനം വിശ്വാസ്യതയാണ്. പരസ്പര വിശ്വാസത്തിന് ചെറിയൊരു ഉലച്ചിൽ തട്ടിയാൽ പോലും അത് സുഹൃത്തുക്കൾക്കിടയിൽ വലിയ വിള്ളലുകൾ ഉണ്ടാക്കുന്നതിലേക്ക് വഴിവയ്ക്കും. എന്നാൽ സുഹൃത്തുക്കൾക്കിടയിലെ ഈ ബന്ധത്തെ സ്വാധീനിക്കാൻ രാശിചിഹ്നങ്ങൾക്ക് സാധിക്കുമോ? തീർച്ചയായും അതെ. ഓരോ വ്യക്തിയുടെയും സ്വഭാവവും പെരുമാറ്റവുമെല്ലാം ജന്മരാശികളെ ആശ്രയിച്ചാണെന്നിരിക്കെ ചില പ്രത്യേക രാശികളിൽ ജനിച്ചവർക്ക് ഉത്തമന്മാരായ സുഹൃത്തുക്കളാകാൻ ആകുമെന്നത് ഉറപ്പ്.
ഇടവം രാശി (Taurus) (ജന്മദിനം ഏപ്രിൽ 21 മുതൽ മേയ് 21 വരെയുള്ളവർ): വിശ്വാസ്യതയിൽ ഒന്നാം സ്ഥാനക്കാരാണ് ഇടവം രാശിക്കാർ. ഒരാളുമായി ആഴത്തിലുള്ള സൗഹൃദത്തിലേർപ്പെട്ടാൽ അവരോട് കൂറുപുലർത്തുന്നതിന് അങ്ങേയറ്റം പ്രാധാന്യം ഈ രാശിക്കാർ നൽകും. ഏതൊരു പ്രതിസന്ധിഘട്ടത്തിലും ഒപ്പം നിൽക്കാനും സാന്ത്വനമാകാനും ഇവർക്ക് പ്രത്യേക കഴിവുണ്ട്. നിങ്ങളുമായി ബന്ധപ്പെട്ട രഹസ്യങ്ങൾ എന്തുതന്നെയായാലും ഈ രാശിയിൽപ്പെട്ട സുഹൃത്തുക്കളോട് തുറന്നു പറയാം. ജീവിതാവസാനം വരെ സൗഹൃദം കാത്തുസൂക്ഷിക്കണമെന്ന ചിന്തയാണ് ഇവരുടെ വിശ്വാസ്യതയ്ക്ക് ആധാരം.
കർക്കടകം രാശി (Cancer) (ജന്മദിനം ജൂൺ 22 മുതൽ ജൂലൈ 23 വരെയുളളവർ): ഒപ്പമുള്ളവരെ സംരക്ഷിക്കുന്നതിന് പ്രാധാന്യം നൽകുന്നവരാണ് കർക്കടകം രാശിക്കാർ. ഈ രാശിയിൽ ജനിച്ച ഒരു ആത്മാർത്ഥ സുഹൃത്ത് നിങ്ങൾക്കുണ്ടെങ്കിൽ ജീവിതത്തിന്റെ അവസാനംവരെ ആ ആത്മാർത്ഥതയിൽ ഇളക്കം തട്ടില്ല എന്ന് ഉറപ്പിക്കാം. നിങ്ങളുടെ ക്ഷേമത്തിന് പരമ പ്രാധാന്യമാവും അവർ നൽകുക. ദുഃഖങ്ങളിൽ താങ്ങേകാനും എന്ത് കാര്യവും ക്ഷമയോടെ കേട്ടിരിക്കാനും വെല്ലുവിളികളിൽ പിന്തുണയേകാനും ഇവർ ഒപ്പമുണ്ടാകും.
വൃശ്ചികം രാശി (Scorpio) (ജന്മദിനം ഒക്ടോബർ 24 മുതൽ നവംബർ 22 വരെയുള്ളവർ): വിശ്വാസ്യതയുടെ കാര്യത്തിൽ മുൻനിരയിൽ നിൽക്കുന്ന മറ്റൊരു രാശി വൃശ്ചികമാണ്. ബന്ധത്തിലുള്ള പ്രതിബദ്ധതയാണ് ഈ രാശിക്കാരുടെ മുഖമുദ്ര. നിങ്ങൾക്ക് വേണ്ടി ഏത് വലിയ പ്രതിസന്ധികൾ നേരിടാനും ഇവർ തയാറാകും. നിങ്ങൾ തിരഞ്ഞെടുത്തിരിക്കുന്ന പാത തെറ്റാണെങ്കിൽ നേർവഴിക്ക് നടത്താനുള്ള ഇവരുടെ കഴിവും എടുത്തു പറയേണ്ടതാണ്. ഇവരുടെ വിശ്വാസ്യത പലപ്പോഴും പരീക്ഷണങ്ങൾക്ക് വിധേയമാകും എന്നതാണ് മറ്റൊരു കാര്യം.
മകരം രാശി (Capricorn) (ജന്മദിനം ഡിസംബർ 23 മുതൽ ജനുവരി 20 വരെയുള്ളവർ): സാഹചര്യം എന്തുമാകട്ടെ, സധൈര്യം നിങ്ങൾക്ക് ഒപ്പം കൂട്ടാവുന്ന സുഹൃത്തുക്കളാണ് മകരം രാശിയിൽ ജനിച്ചവർ. ഉത്തരവാദിത്വവും പ്രതിബദ്ധതയും സൗഹൃദത്തിൽ കാത്തുസൂക്ഷിക്കാൻ ഇവർ ശ്രദ്ധിക്കും. നേരമ്പോക്കിന് സുഹൃത്തുക്കളായിരിക്കുക എന്നതിനപ്പുറം വളരെ ഗൗരവത്തോടെ ആ ബന്ധത്തെ കാണുന്നവരാണ് ഇക്കൂട്ടർ. ഏതുകാര്യത്തിനും നിങ്ങൾക്ക് ഇവരെ ആശ്രയിക്കാം. പ്രായോഗികതലത്തിൽ ചിന്തിച്ച് പ്രശ്നങ്ങൾക്ക് പരിഹാരം നിർദ്ദേശിക്കാൻ ഇവർക്ക് സാധിക്കുമെന്നതിനാൽ ജീവിതത്തിൽ ഇവരുടെ സാന്നിധ്യം എപ്പോഴും ഗുണകരമായിരിക്കും.