ഈ ആഴ്ച ഓരോ നക്ഷത്രക്കാർക്കും എങ്ങനെ? സമ്പൂർണ നക്ഷത്രഫലം– കാണിപ്പയ്യൂർ

അശ്വതി: സന്താനങ്ങളുടെ ഉപരിപഠനം മനസ്സിലുദ്ദേശിച്ച വിധത്തിൽ പൂർത്തീകരിക്കുവാൻ സാധിച്ചതിൽ മനസ്സമാധാനമുണ്ടാകും.  മകളുടെ വിദ്യാഭ്യാസ കാര്യങ്ങളിൽ ആശങ്ക വർധിക്കും. പദ്ധതി ആസൂത്രണങ്ങളിൽ ലക്ഷ്യപ്രാപ്തി നേടും.

ഭരണി: മേലധികാരിയുടെ ദുഃസംശയങ്ങൾക്ക് വിശദീകരണം നൽകേണ്ടിവരും. സുഹൃത് ഹായത്തിൽ വിദേശ ഉദ്യോഗത്തിന് യോഗമുണ്ട്. 

കാർത്തിക: ആത്മാർഥമായ പ്രവർത്തനങ്ങളാൽ ആനുകൂല്യങ്ങളും സ്ഥാനമാനങ്ങളും വർധിക്കുന്ന ഉദ്യോഗത്തിന് നിയമനാനുമതി ലഭിക്കും. അവധിയെടുത്ത് വിശേഷപ്പെട്ട ദേവാലയദർശനം നടത്തുവാനിടവരും. 

രോഹിണി: വിവിധ ആവശ്യങ്ങൾക്കായി അവധിയെടുത്തു യാത്രകൾ വേണ്ടിവരും.  വിശേഷപ്പെട്ട ദേവാലയദർശനത്തിന് അവസരം ലഭിക്കും. 

മകയിരം: കാര്യനിർവഹണശക്തിയും ഉത്സാഹവും ഉന്മേഷവും വർധിക്കും. അന്യരുടെ വിഷമാവസ്ഥകൾക്കു ശാശ്വതപരിഹാരം കണ്ടെത്തും. 

തിരുവാതിര: പഠിച്ച വിഷയത്തോടനുബന്ധമായ ഉദ്യോഗത്തിന് നിയമനാനുമതി ലഭിക്കും. പുനഃപരീക്ഷയിൽ വിജയിക്കും. 

പുണർതം: കടപ്പാടുകൾ മറക്കാതെ പ്രവർത്തിക്കുന്നതിനാൽ ക്രമേണ അഭ്യുന്നതിയുണ്ടാകും. മുടങ്ങിക്കിടപ്പുള്ള വഴിപാടുകൾ ചെയ്തു തീർക്കുവാനിടവരും. 

പൂയം: കുടുംബത്തിൽ സ്വസ്ഥതയും സമാധാനവും ഉണ്ടാകും. പഠിച്ച വിഷയത്തോടനുബന്ധമായ ഉദ്യോഗത്തിനു നിയമനാനുമതി ലഭിക്കും. കലാകായിക മത്സരങ്ങളിൽ വിജയിക്കും. 

ആയില്യം: സത്യസന്ധവും നീതിയുക്തവുമായ പ്രവർത്തന ശൈലി എതിർപ്പുകളെ അതിജീവിച്ചു കാര്യവിജയം കൈവരിക്കുവാൻ വഴിയൊരുക്കും. സന്ധി സംഭാഷണത്തിൽ മധ്യസ്ഥ സ്ഥാനം വഹിക്കുവാനിട വരും. 

മകം: ചിരകാലാഭിലാഷ പ്രാപ്തിയായ വിദേശയാത്രയ്ക്ക് അനുമതി ലഭിക്കും. അന്തിമമായി ഉപരിപഠനത്തിന് ഉദ്ദേശിച്ച സ്ഥാപനത്തിൽ പ്രവേശനം ലഭിക്കും. 

പൂരം: ചിന്തകൾക്കതീതമായി പ്രവർത്തിക്കുവാൻ സാധിച്ചതിൽ ആത്മാഭിമാനം തോന്നും. ആധ്യാത്മികാത്മീയ പ്രഭാഷണങ്ങൾ കേൾക്കാനിടവരും. മത്സര രംഗങ്ങളിൽ വിജയം കൈവരിക്കും. 

ഉത്രം: പ്രത്യുപകാരം ചെയ്യുവാൻ അവസരമുണ്ടാകും. അസാധ്യമെന്നു തോന്നുന്ന കാര്യങ്ങൾ നിഷ്പ്രയാസം സാധിക്കും. 

അത്തം: സഹപ്രവർത്തകന് സാമ്പത്തിക സഹായം നൽകുവാനിടവരും. ഏറ്റെടുത്ത ചുമതലകൾ ചെയ്തീർക്കുവാൻ അത്യധ്വാനം വേണ്ടിവരും. 

ചിത്തിര: അവസ്ഥാഭേദങ്ങൾക്കനുസരിച്ചു മാറുന്ന പുത്രന്റെ സമീപനത്തിൽ ആശങ്ക വർധിക്കും. ഊഹാപോഹങ്ങൾ പലതും കേൾക്കുമെങ്കിലും സത്യാവസ്ഥ അന്വേഷിച്ചറിയാതെ പ്രതികരിക്കരുത്. 

ചോതി: അനാഥർക്കും അശരണരായവർക്കും ഉപരിപഠനത്തിന് സഹായം നൽകുവാനിട വരും. പട്ടണത്തിൽ പണി ചെയ്തുവരുന്ന ഗൃഹം വാങ്ങുവാൻ പ്രാഥമികസംഖ്യ കൊടുത്തു കരാറെഴുതും. 

വിശാഖം: കുടുംബജീവിതത്തിൽ സന്തുഷ്ടിയും സമാധാനവും ഉണ്ടാകും. സഹപാഠിയോടൊപ്പം ഉപരിപഠനത്തിനു ചേരുവാൻ സാധിച്ചതിൽ സമാധാനമുണ്ടാകും. 

അനിഴം: മാസത്തിലൊരിക്കൽ ഗൃഹത്തിൽ വന്നുപോകുവാൻ തക്കവണ്ണം ഉദ്യോഗമാറ്റമുണ്ടാകും. സാമ്പത്തിക ക്രയവിക്രയങ്ങളിൽ വളരെ സൂക്ഷിക്കണം. 

തൃക്കേട്ട: വിശേഷപ്പെട്ട ദേവാലയദർശനം നടത്തുവാനിടവരും. അധിവാസ ഗൃഹത്തിനോടനുബന്ധമായ പട്ടണത്തിലേക്ക് ഉദ്യോഗമാറ്റമുണ്ടാകും. കാഴ്ചപാടുകളുടെ വ്യത്യസ്തതയാൽ സംയുക്ത സംരംഭങ്ങളിൽ നിന്നു പിന്മാറും. 

മൂലം: പ്രവർത്തനമണ്ഡലങ്ങളിൽ നിന്നും സാമ്പത്തിക പുരോഗതി കൈവരും. അവിചാരിത ചെലവുകൾ വർധിക്കും. കാലഹരണപ്പെട്ട ഗൃഹോപകരണങ്ങൾ മാറ്റിവാങ്ങുവാനിടവരും

പൂരാടം: മികച്ച പ്രകടനം കാഴ്ചവയ്ക്കുവാൻ സാധിച്ചതിൽ പാരിതോഷികം ലഭിക്കും. സഹവർത്തിത്വ ഗുണത്താൽ സദ്ചിന്തകൾ വർധിക്കും. സഹപാഠിയോടൊപ്പം ഉപരിപഠനത്തിന് ചേരുവാൻ സാധിക്കും.

ഉത്രാടം: സ്ഥാനമാനങ്ങളും ആനുകൂല്യങ്ങളും വർധിക്കുന്ന വിഭാഗത്തിലേക്ക് ഉദ്യോഗമാറ്റമുണ്ടാകും. ആഗ്രഹ സാഫല്യത്തിനായി അശ്രാന്ത പരിശ്രമം വേണ്ടിവരും. വ്യവസ്ഥകളിൽ നിന്നും വ്യതിചലിക്കരുത്. 

തിരുവോണം: മറ്റുള്ളവരുടെ കാഴ്ചപ്പാടിൽ സമ്പന്നനാണെന്നു തോന്നുന്ന വിധം ജീവിക്കുവാൻ സാധിക്കുന്നതിൽ ആശ്വാസം തോന്നും. കലാകായിക മത്സരങ്ങളിൽ വിജയിക്കും. 

അവിട്ടം: ഉദ്ദേശിച്ച സ്ഥലത്തേക്ക് ഉദ്യോഗമാറ്റമുണ്ടാകും. ഹ്രസ്വകാല സുരക്ഷാപദ്ധതികളിൽ പണം നിക്ഷേപിക്കും. ഗർഭം ധരിക്കുവാനുള്ള സാഹചര്യമുണ്ടാകും. വാഹനാപകടത്തിനു സാക്ഷിയാകും. 

ചതയം: ഗൃഹനിർമാണ പ്രവർത്തനങ്ങൾ ഏറെക്കുറെ പൂർത്തീകരിച്ചു ഗൃഹപ്രവേശനകർമം നിർവഹിക്കും. വിദേശത്തു സ്ഥിരതാമസത്തിനുള്ള അനുമതി അപേക്ഷ നൽകും. 

പൂരുരുട്ടാതി: പ്രവർത്തനമേഖലകളിൽ നിന്നു സാമ്പത്തികനേട്ടമുണ്ടാകും. പ്രായത്തിലുപരി പക്വതയുള്ള പുത്രന്റെ സമീപനത്തിൽ ആശ്വാസം കണ്ടെത്തും. 

ഉത്തൃട്ടാതി: അസാധാരണ വ്യക്തിത്വമുള്ളവരുമായി സംസർഗത്തിലേർപ്പെടുവാൻ അവസരമുണ്ടാകും. വിദേശത്ത് സ്ഥിരതാമസത്തിനുള്ള അനുമതിക്ക് അപേക്ഷ നൽകും. 

രേവതി: വാഹനം മാറ്റിവാങ്ങുവാനിടവരും. വിവരസാങ്കേതിക വിദ്യയിൽ പുതിയ കണ്ടെത്തലുകൾക്കു സാക്ഷിയാകും. എതിർപ്പുകളെ അതിജീവിക്കുവാൻ സാധിക്കും. പൊതുപ്രവർത്തനങ്ങൾക്ക് അംഗീകാരവും പ്രോത്സാഹനവും ലഭിക്കും.