ഈ ആഴ്ച ഓരോ നക്ഷത്രക്കാർക്കും എങ്ങനെ? സമ്പൂർണ നക്ഷത്രഫലം– കാണിപ്പയ്യൂർ
Mail This Article
അശ്വതി: പഠിച്ച വിദ്യയോടനുബന്ധമായ ഉദ്യോഗം ലഭിക്കും. ജീവിതപങ്കാളിക്ക് അർഹമായ പൂർവികസ്വത്ത് രേഖാപരമായി ലഭിക്കും. പറയുന്ന വാക്കുകൾ ഫലപ്രദമായിത്തീരും.
ഭരണി: സുഹൃത്തിന്റെ പുതിയ സംരംഭത്തിന് ആശംസകൾ നേരും. ഔദ്യോഗിക ചുമതലകളാൽ കുടുംബത്തിന്റെ കാര്യങ്ങളിൽ മറവിയുണ്ടാകും. ഗതാഗതനിയമം തെറ്റിക്കുന്നതിനാൽ പിഴ അടയ്ക്കേണ്ടതായിവരും.
കാർത്തിക: ദൂരദേശത്തേക്ക് ഉദ്യോഗമാറ്റമുണ്ടാകും. സാങ്കേതിക തടസ്സങ്ങളാൽ വിദേശയാത്ര മാറ്റിവയ്ക്കും. ജാമ്യം നിൽക്കരുത്.
രോഹിണി: വിദേശത്തുള്ളവർക്കു സ്ഥിരതാമസാനുമതി ലഭിക്കും. വിതരണമേഖലയിൽ ഉണർവുണ്ടാകും. വീഴ്ചകളുണ്ടാകാതെ സൂക്ഷിക്കണം.
മകയിരം: ഏറക്കുറെ പൂർത്തിയായ ഗൃഹത്തിൽ താമസം തുടങ്ങും. ഗുരുനാഥന്റെ ഉപദേശപ്രകാരം ഉപരിപഠനത്തിനു ചേരും.
തിരുവാതിര: ആത്മാർഥസുഹൃത്തിനെ അബദ്ധങ്ങളിൽ നിന്നും രക്ഷിക്കുവാൻ സാധിക്കുന്നതിൽ സംതൃപ്‌തിയുണ്ടാകും. മംഗളകർമങ്ങളിൽ ആചാര്യസ്ഥാനം വഹിക്കും.
പുണർതം: വരവും ചെലവും തുല്യമായിരിക്കും. പുതിയ സംരംഭങ്ങളുടെ സാധ്യതകളെപ്പറ്റി വിലയിരുത്തും. കാര്യകാരണസഹിതം സമർപ്പിക്കുന്ന അപേക്ഷകൾ പരിഗണിക്കപ്പെടും.
പൂയം: ആരാധനാലയത്തിലെ ഉത്സവാഘോഷങ്ങളിൽ സജീവമായി പങ്കെടുക്കും. പാരമ്പര്യ പ്രവൃത്തികളുടെ പ്രാധാന്യം മനസ്സിലാക്കി പ്രവർത്തിക്കും.
ആയില്യം: സാമ്പത്തിക അനിശ്ചിതാവസ്ഥ പരിഹരിക്കും. പൂർവികസ്വത്ത് രേഖാപരമായി ലഭിക്കുവാൻ നിയമസഹായം തേടും. കാർഷികമേഖലയിൽ താൽപര്യം വർധിക്കും.
മകം: വാഹനം മാറ്റിവാങ്ങുവാനിടവരും. മക്കളുടെ സംരക്ഷണം മനസ്സമാധാനത്തിനു വഴിയൊരുക്കും. നടപടിക്രമങ്ങളിൽ അപാകതകൾ ഉണ്ടാകാതെ സൂക്ഷിക്കണം.
പൂരം: ആശ്വാസകരമായ ഘടകങ്ങൾ വ്യാപാരമേഖലയിൽ നിന്നും കണ്ടുതുടങ്ങും. കക്ഷിരാഷ്ട്രീയ പ്രവർത്തനങ്ങൾ ഉപേക്ഷിച്ചു വിദേശ ഉദ്യോഗത്തിനു ശ്രമിക്കും..
ഉത്രം: വാഗ്വാദങ്ങളിൽ നിന്നും പിന്മാറുകയാണു നല്ലത്. നിരപരാധിത്വം തെളിയിക്കുവാൻ അവസരമുണ്ടാകും. വിതരണരംഗത്ത് ഉണർവുണ്ടാകും.
അത്തം: മേലധികാരിയുടെ ആജ്ഞ അർധമനസ്സോടുകൂടി അനുസരിക്കും. സംയുക്തസംരംഭങ്ങളിൽ നിന്നും പിന്മാറും. സാമ്പത്തിക അനിശ്ചിതാവസ്ഥ പരിഹരിക്കും.
ചിത്തിര: ചർച്ചകൾ, സന്ധിസംഭാഷണം തുടങ്ങിയവയിൽ വിജയിക്കും. കുടുംബജീവിതത്തിൽ സന്തുഷ്ടിയും സമാധാനവും ഉണ്ടാകും. ഔദ്യോഗികമായി യാത്രാക്ലേശം വർധിക്കും.
ചോതി: ഉദ്യോഗത്തിൽ ഉയർന്ന പദവി ലഭിക്കും. തീരുമാനങ്ങളിൽ ഔചിത്യമുണ്ടാകും. ചിരകാല അഭിലാഷപ്രാപ്‌തിയായ വിദേശയാത്ര സഫലമാകും.
വിശാഖം: നിശ്ചയിച്ച കാര്യങ്ങൾക്കു വ്യതിചലനം വന്നുചേരും. നിർണായക തീരുമാനങ്ങൾക്കു വിദഗ്ധ നിർദേശം തേടും. സഹോദരങ്ങളുടെ നിർബന്ധത്താൽ പൂർവികസ്വത്ത് ഭാഗംവയ്ക്കുവാൻ തീരുമാനിക്കും.
അനിഴം: വരവും ചെലവും തുല്യമായിരിക്കും. വാക്കും പ്രവൃത്തിയും ഫലപ്രദമാകും. സൽക്കീർത്തി വർധിക്കും.
തൃക്കേട്ട: ഉത്തരവാദിത്തങ്ങൾ വർധിക്കുന്ന വിഭാഗത്തിലേക്ക് ഉദ്യോഗമാറ്റമുണ്ടാകും. ഔദ്യോഗികമായ യാത്രകളും ചർച്ചകളും നിഷ്‌ഫലമാകും. വ്യാപാര വിതരണ മേഖലകളിൽ മാന്ദ്യം അനുഭവപ്പെടും.
മൂലം: അവതരണശൈലിയിൽ പുതിയ ആശയങ്ങൾ അവലംബിക്കും. ബന്ധുക്കൾ വിരുന്നുവരും. വിശേഷപ്പെട്ട ദേവാലയ ദർശനം നടത്തുവാനിടവരും.
പൂരാടം: തൊഴിൽമേഖലകളിൽ അഹോരാത്രം പ്രയത്നിക്കും. പുത്രപൗത്രാദികൾ അവധിക്കു വന്നുചേരുന്നതിനാൽ ആശ്വാസവും സമാധാനവും തോന്നും. അവസരങ്ങൾ പരമാവധി പ്രയോജനപ്പെടുത്തുവാൻ സാധിക്കും.
ഉത്രാടം: കുടുംബത്തിൽ സ്വസ്ഥതയും സമാധാനവും ഉണ്ടാകും. മാതാപിതാക്കളെ അനുസരിക്കുന്നതിൽ ആത്മസംതൃപ്തിയുണ്ടാകും. പദ്ധതിസമർപ്പണത്തിൽ ലക്ഷ്യപ്രാപ്തി നേടും.
തിരുവോണം: വിദേശ ഉദ്യോഗത്തിന്റെ അനിശ്ചിതാവസ്ഥ കാരണത്താൽ കുടുംബാംഗങ്ങളെ ജന്മനാട്ടിലേക്കു തിരിച്ചയയ്ക്കും. ആധുനിക സംവിധാനത്തോടുകൂടിയുള്ള കാർഷികമേഖലയ്ക്കു തുടക്കം കുറിക്കും.
അവിട്ടം: യാത്രാക്ലേശം വർധിക്കുന്ന വിഭാഗത്തിലേക്ക് ഉദ്യോഗമാറ്റമുണ്ടാകും. മാതാപിതാക്കളുടെ ആവശ്യങ്ങൾക്കു പ്രാധാന്യം നൽകും.
ചതയം: പ്രവർത്തനമേഖലകളിൽ ക്രമാനുഗതമായ വളർച്ച അനുഭവപ്പെടും. വിദേശത്തുള്ളവർക്ക് അവധിയെടുത്തു ജന്മനാട്ടിൽ വരുവാൻ സാധിക്കും.
പൂരുരുട്ടാതി: രക്തശുദ്ധിക്കുറവിനാൽ വിളർച്ച അനുഭവപ്പെടും. സാമ്പത്തികമായി വഞ്ചനയിൽ അകപ്പെടാതെ സൂക്ഷിക്കണം. മേലധികാരിയുടെ പ്രത്യേക പരിഗണനയിൽ ഉദ്യോഗത്തിൽ സ്ഥാനക്കയറ്റം ലഭിക്കും.
ഉത്തൃട്ടാതി: വിശ്വാസയോഗ്യം അല്ലാത്തതിനാൽ സംയുക്തസംരംഭങ്ങളിൽ നിന്നും പിന്മാറും. പുതിയ കരാർജോലികൾ ഏറ്റെടുക്കുവാനിടവരും.
രേവതി: അബദ്ധങ്ങളിൽ നിന്നും സുഹൃത്തിനെ രക്ഷിക്കും. പണയപ്പെടുത്തിയ ആധാരം തിരിച്ചെടുക്കുവാൻ സാധിക്കും.