പുറംബണ്ട് തകർന്ന് കൃഷിയിടത്തിൽ വെള്ളം കയറിയിട്ട് ഒരാഴ്ച

കുട്ടനാട് ∙ പുറംബണ്ട് തകർന്നു കൃഷിയിടത്തിൽ വെള്ളം കയറിയിട്ട് ഒരാഴ്ച പിന്നിട്ടു. തകർന്ന ഭാഗം കുത്തിയെടുക്കാൻ നടപടിയില്ല.നാട്ടുകാർ ദുരിതത്തിലായി. നെടുമുടി കൃഷിഭവൻ പരിധിയിലെ കിഴക്കേ തുമ്പൂരം പാടശേഖരത്തിലാണു പുറംബണ്ട് തകർന്ന് പാടശേഖരത്തിൽ വെള്ളം കയറിയത്. രണ്ടാംകൃഷിയുടെ വിതകഴിഞ്ഞ രണ്ടാഴ്ച പിന്നിട്ടപ്പോഴായിരുന്നു സംഭവം. പൂഴി ഭാഗത്തെ പുറംബണ്ടാണു തകർന്നത്. പാടശേഖരത്തിൽ ഏതാനും വർഷം മുൻപു 1.51 കോടി രൂപയ്ക്കുമേൽ ചെലവിൽ കല്ലുകെട്ടി പുറംബണ്ട് ബലപ്പെടുത്തിയിരുന്നു.

പാടശേഖരങ്ങളുടെ പുറംബണ്ടിൽ താമസിക്കുന്ന നെടുമുടി പഞ്ചായത്ത് 12, 13 വാർഡുകളിലെ നൂറ്റൻപതോളം വീടുകളിലുള്ളവർ ദുരിതത്തിലായി. മടകുത്താൻ പാടശേഖര സമിതിക്കു ഫണ്ട് ഇല്ലാത്തതാണു പ്രതിസന്ധി സൃഷ്ടിക്കുന്നത്. കടംവാങ്ങിയും മറ്റും രണ്ടാംകൃഷിയിറക്കിയ കർഷകർക്കു തകർന്ന ഭാഗം കുത്തിയെടുക്കാനുള്ള തുക കൂടി കണ്ടെത്തുക സാധ്യമല്ല.

പുറംബണ്ടു തകർന്നു കിടക്കുന്നതുമൂലം നാട്ടുകാർക്കും കർഷകർക്കും ഉണ്ടാകുന്ന ബുദ്ധിമുട്ട് ബ്ലോക്ക് പഞ്ചായത്തംഗം ഗോകുൽ ഷാജി കലക്ടറുടെയും പ്രിൻസിപ്പൽ കൃഷി ഓഫിസറുടെയും ശ്രദ്ധയിൽ പെടുത്തി.

പ്രദേശവാസികൾക്കൊപ്പമാണ് ഇരുവരെയും കണ്ടു നിവേദനം സമർപ്പിച്ചത്. പാടശേഖര സമിതി ഭാരവാഹികളെയും പ്രദേശവാസികളെയും പങ്കെടുപ്പിച്ച് ഉടൻ യോഗം നടത്താമെന്ന ഉറപ്പ് ഇരുവരിൽ നിന്നു ലഭിച്ചു.