ആലപ്പുഴ ജില്ലയിൽ ഇന്ന് (19-09-2024); അറിയാൻ, ഓർക്കാൻ

ഇന്ന് 
ചില ജില്ലകളിൽ മിതമായ തോതിൽ മഴയ്ക്ക് സാധ്യത .

ക്രിക്കറ്റ് ടീം സിലക്‌ഷൻ
ആലപ്പുഴ ∙ ജില്ലാ ക്രിക്കറ്റ് അസോസിയേഷൻ 14 വയസ്സിനു താഴെയുള്ള ആൺകുട്ടികളുടെ ജില്ലാ ടീം സിലക്‌ഷൻ ട്രയൽസ് 22ന് രാവിലെ 9ന് എസ്ഡി കോളജ് മൈതാനിയിൽ നടത്തും. 100 രൂപ റജിസ്ട്രേഷൻ ഫീസ് ഉണ്ടാകുമെന്ന് സെക്രട്ടറി അറിയിച്ചു.

സർട്ടിഫിക്കറ്റ് വെരിഫിക്കേഷൻ
ആലപ്പുഴ ∙ കെ-ടെറ്റ് ഏപ്രിൽ 2024 പരീക്ഷയിൽ ജില്ലാ വിദ്യാഭ്യാസ ഓഫിസിന്റെ പരിധിയിലെ വിജയികളുടെ സർട്ടിഫിക്കറ്റ് വെരിഫിക്കേഷൻ 24നും 25നും രാവിലെ 10.30ന് ആലപ്പുഴ ഗവ. ഗേൾസ് ഹൈസ്‌കൂൾ ഓഡിറ്റോറിയത്തിൽ നടത്തും. വിജയികൾ ഒറിജിനൽ ഹാൾടിക്കറ്റ്, ഹാൾടിക്കറ്റിന്റെ പകർപ്പ്, റിസൽറ്റ് പകർപ്പ്, എല്ലാ സർട്ടിഫിക്കറ്റുകളുടെയും മാർക്ക് ലിസ്റ്റുകളുടെയും അസ്സലും പകർപ്പും, മാർക്ക് ആനുകൂല്യം ലഭിച്ചവർ ബന്ധപ്പെട്ട രേഖകളുടെ അസ്സലും പകർപ്പും (നോൺ ക്രീമിലെയർ സർട്ടിഫിക്കറ്റ് നിർബന്ധമായും) വെരിഫിക്കേഷൻ സമയത്തു ഹാജരാക്കണം.

സിലക്ട് കമ്മിറ്റി യോഗം 26ന്
ആലപ്പുഴ ∙ നിയമസഭയുടെ 2023 ലെ കേരള പൊതുരേഖ ബിൽ സംബന്ധിച്ച് നിയമസഭ സിലക്ട് കമ്മിറ്റി യോഗം 26ന് എറണാകുളം കലക്ടറേറ്റ് കോൺഫറൻസ് ഹാളിൽ നടക്കും. ബില്ലിലെ വ്യവസ്ഥകളിൽ നിർദേശങ്ങളും അഭിപ്രായങ്ങളും യോഗത്തിൽ നേരിട്ടോ രേഖാമൂലമോ നൽകാം. 

അധ്യാപകർ
കുട്ടനാട് ∙ കുട്ടമംഗലം എസ്എൻഡിപി ഹയർ സെക്കൻഡറി സ്കൂളിൽ എച്ച്എസ്ടി കണക്ക് വിഷയത്തിൽ ഒഴിവിലേക്ക് അധ്യാപകരെ നിയമിക്കുന്നു. യോഗ്യതയുള്ള അസ്സൽ രേഖകളുമായി 23ന് 10നു മാനേജ്മെന്റ് ഓഫിസിൽ നേരിട്ട് എത്തിച്ചേരുക. 9446379797.

വൈദ്യുതി മുടക്കം
മുഹമ്മ∙ കൊച്ചനാകുളങ്ങര ട്രാൻസ്ഫോമറിന്റെ പരിധിയിൽ ഇന്നു രാവിലെ 9 മുതൽ 2 വരെയും തടുത്തുവെളി ട്രാൻസ്ഫോമറിന്റെ പരിധിയിൽ 2 മുതൽ വൈകിട്ട് 5.30 വരെയും വൈദ്യുതി മുടങ്ങും.