മുന്നറിയിപ്പില്ലാതെ റോഡ് അടച്ചു: ആലപ്പുഴ നഗരത്തിൽ വൻ ഗതാഗതക്കുരുക്ക്

ആലപ്പുഴ∙ മുന്നറിയിപ്പില്ലാതെ റോഡ് അടച്ചുകെട്ടി സിറ്റി ഗ്യാസ് പദ്ധതിയുടെ പൈപ്പ് ലൈൻ സ്ഥാപിക്കുന്ന ജോലികൾ നടത്തിയതു മൂലം നഗരത്തിൽ വൻ ഗതാഗതക്കുരുക്ക്. രാവിലെ ഏറെ തിരക്കുള്ള ഒൻപതിനും പത്തിനും ഇടയിലാണ് ഇന്നലെ കോൺവന്റ് ജംക്‌ഷനിലെ നാലു പ്രധാന റോഡുകൾ ചേരുന്ന ഭാഗത്തു റോഡിന്റെ മുക്കാൽ ഭാഗത്തോളം ബാരിക്കേഡ് വച്ച് അടച്ചത്. ഇതോടെ സ്കൂളിലേക്കും ഓഫിസുകളിലേക്കും എത്തേണ്ട യാത്രികർ ദുരിതത്തിലായി. 

ശവക്കോട്ടപ്പാലം മുതൽ ലിയോ തേർട്ടീൻത് സ്കൂൾ വരെ വാഹനങ്ങളുടെ നിര നീണ്ടു. നാലു ഭാഗത്തു നിന്നുമെത്തിയ വാഹനങ്ങൾ ഗതാഗതക്കുരുക്കിൽപെട്ടു. ട്രാഫിക് നിയന്ത്രണത്തിനു പൊലീസിനെ ഏർപ്പെടുത്തിയിരുന്നെങ്കിലും വാഹനത്തിരക്കു നിയന്ത്രിക്കാനായില്ല. മണിക്കൂറുകൾക്ക് ശേഷമാണു ഗതാഗതം സാധാരണ നിലയിലായത്.