കുടുംബത്തിലെ 6 പേരെ കവർന്ന് അപകടം

ചെന്നൈ ∙ മഹാബലിപുരത്തിനടുത്ത് ഓട്ടോ റിക്ഷ സർക്കാർ ബസുമായി കൂട്ടിയിടിച്ച് 2 കുട്ടികളടക്കം ഒരേ കുടുംബത്തിലെ 6 പേർ മരിച്ചു. ഓട്ടോ ഡ്രൈവർ ഗോവിന്ദൻ, അമ്മ, ഭാര്യ, മകൾ, അഞ്ചും ഏഴും വയസ്സുള്ള രണ്ട് പേരക്കുട്ടികൾ എന്നിവരാണ് സംഭവസ്ഥലത്തു തന്നെ മരിച്ചത്. കാരപ്പാക്കത്തു നിന്ന് ചെന്നൈയിലേക്കു ഓട്ടോയിൽ പോകുകയായിരുന്നു കുടുംബം. 

പുതുച്ചേരിയിലേക്ക് പോകുകയായിരുന്ന തമിഴ്നാട് സ്റ്റേറ്റ് എക്സ്പ്രസ് കോർപറേഷൻ ബസുമായി ഈസ്റ്റ് കോസ്റ്റ് റോഡിൽ മാനാമൈ ഗ്രാമത്തിനു സമീപമാണു കൂട്ടിയിടിച്ചത്.