ചക്കാലപ്പാറയിൽ റോഡിൽ മരത്തിന്റെ ശിഖരം വീണ് ഗതാഗതം തടസ്സപ്പെട്ടു

ഇല‍ഞ്ഞി∙ മുത്തോലപുരം ചക്കാലപ്പാറയിൽ റോഡിൽ മരത്തിന്റെ ശിഖരം വീണ് ഗതാഗതം തടസ്സപ്പെട്ടു. റോഡിലേക്ക് അപകടകരമായി ചരിഞ്ഞു നിൽക്കുന്ന മരത്തിന്റെ വലിയ ശിഖരമാണു വീണത്. വൈദ്യുതി ലൈനിലാണു ശിഖരം വീണത്. മേഖലയിൽ വൈദ്യുതി തടസ്സപ്പെട്ടു. നേരത്തെ മരത്തിന്റെ അപകടാവസ്ഥ ചൂണ്ടിക്കാട്ടി മനോരമ വാർത്ത നൽകിയിരുന്നു. 2 വലിയ വാഹനങ്ങൾ ഒരേസമയം എതിർദിശയിൽ വരുമ്പോൾ കൂത്താട്ടുകുളം ഭാഗത്തേക്കുള്ള വാഹനത്തിന്റെ ഉയരമുള്ള ഭാഗം മരത്തിൽ ഇടിക്കുന്ന സാഹചര്യമാണ്. മരം മുറിച്ചു നീക്കണമെന്ന് ആവശ്യപ്പെട്ട് കലക്ടർ, പിഡബ്ല്യുഡി, ഫോറസ്റ്റ് അധികൃതർ എന്നിവർക്ക് നാട്ടുകാർ പരാതി നൽകിയെങ്കിലും ഇതുവരെ നടപടിയായിട്ടില്ല.